Réttað yfir föngum á Guantanamo

Blaðamenn fylgdust í gær í fyrsta sinn með réttarhöldum yfir stríðsföngum Bandaríkjamanna, sem þeir hafa haldið í fangelsinu á Guantanamo flóa á Kúbu án dóms og laga í meira en tvö ár. Myndatökur voru hins vegar ekki leyfðar í réttarsal. Réttað var yfir tveimur afgönskum föngum sem sögðust hafa verið í hersveitum Talíbana en mennirnir neituðu að hafa barist gegn Bandaríkjamönnum. Annar fanginn, sem er þrjátíu og eins árs, sagðist hafa gefist upp fyrir Bandaríkjamönnum þar sem hann tryði á að þeir styddu mannréttindi. Hinn fanginn, fjörutíu og níu ára, sagði að Talíbanar hafi komið heim til sín, rænt sér og neytt sig til að berjast með þeim. Á næstunni verður réttað yfir þeim tæplega sex hundruð föngum sem eru í fangelsinu á Guantanamo flóa en þetta er í fyrsta sinn sem þeir fá tækifæri til að standa fyrir máli sínu.