Síðasta mannvirkið vígt

Miðasala á Ólympíuleikana í Grikklandi, sem hefjast á föstudaginn, hefur tekið við sér eftir rólega byrjun. Eitt af síðustu mannvirkjunum var vígt í gær, þriggja kílómetra löng brú sem tengir suðurhluta landsins við meginlandið. Brúin var vígð með tilheyrandi flugeldasýningu í gærkvöldi. Umferð verður þó ekki hleypt á hana fyrr en á fimmtudaginn, degi fyrir setningarathöfn leikanna. Flugeldasýningin í gær var því einskonar generalprufa, en skipuleggjendur segja setninguna verða glæsilegri en nokkru sinni fyrr og munu níu þúsund manns koma að henni. Umræða um hryðjuverk, seinkun á framkvæmdum og nú síðustu dagana fyrir leikana, um lyfjanotkun íþróttamanna, sem eru sumir hverjir að falla á prófum hefur skyggt á leikana. Miðasala á heimsvísu hefur því verið dræmari en vonir stóðu til. Búist var við meiri sölu en fyrir Ólympíuleikana í Sidney í Ástralíu árið 2000, bæði vegna landfræðilegrar legu Grikklands, í miðri Evrópu, og hins sögulega bakgrunns, en fyrstu nútímaleikarnir voru einmitt haldnir í Aþenu 1896. Nú hefur salan tekið kipp og hafa 150 þúsund miðar selst á þremur dögum. Stefnt er á að selja þrjá og hálfa milljón af rúmlega fimm milljón miðum fyrir setningarathöfnina á föstudaginn.