Sprengjur í ferðamannabæjum Spánar

Tvær litlar sprengjur sprungu í ferðamannabæjum á norðurströnd Spánar í dag. Engin meiðsl urðu á fólki en svo virðist sem ETA, hryðjuverkasamtök baskneskra aðskilnaðarsinna standi á bak við tilræðin og séu þar með að vakna til lífsins á ný. Sprengjurnar sprungu um hádegisbil í bæjunum Ribas de Sella og San Vicente de la Barquera. Áður hafði einhver sem sagðist tilheyra ETA hringt til ritstjórnar baskneska dagblaðsins Gara og varað við sprengjunum. Spönsk stjórnvöld vöruðu við því í gær að ETA kynni að hefja röð sprengjutilræða á sumarleyfisstöðum í landinu á næstunni.