Ármann leiðir sjálfstæðismenn í Kópavogi

Ármann Kr. Ólafsson sigraði prófkjör sjálfstæðismanna í Kópavogi sem fram fór í gær vegna sveitarstjórnarkosninganna í vor. Hann hlaut 1677 atkvæði í 1. sæti eða 52,5% greiddra atkvæða. Hildur Dungal hreppti annað sætið, en Gunnar Birgisson fyrrverandi bæjarstjóri hafnaði í því þriðja.

Slökkviliðið fór að Dvergabakka

Slökkviliðið sendi allt tiltækt lið að Dvergabakka klukkan korter í tíu í kvöld. Óttast var að eldur hefði komið upp í íbúð þar. Þegar fyrsti bíll kom á staðinn var ljóst að ekki var um meiriháttar eld að ræða og var þá allt lið fyrir utan bílinn sem var kominn á staðinn afturkallað. Íbúðin var reykræst. Nú er talið að einungis hafi verið um reyk af eldavélinni að ræða en ekki eld.

Fjórir skiptu með sér fyrsta vinningi í lottó

Fjórir voru með allar tölur réttar í lottóinu í kvöd. Hlýtur hver um sig tæpar 11 milljónir króna í vinning. Vinningstölurnar voru 11, 13, 18, 30 og 40.

Stjórnarkreppan í Hollandi hefur ekki áhrif á Icesaveviðræðurnar

Stjórnarkreppan í Hollandi breytir ekki framgangi mála í Icesaveviðræðunum að mati stjórnmálaskýranda í Hollandi.

Loðnuveiðimenn bíða enn

Svo virðist sem loðnan hafi lónað lengra til vesturs frá því í gær. Nú lóðar á loðnutorfur rétt austan við Eyjar. Gísli Óskarsson, fréttaritari í Vestmannaeyjum, hefur það eftir sjómönnum að flestar torfurnar séu á bili sem nær frá Bjarnarey austur í Háfadýpi.

Ármann enn efstur

Ármann Kr. Ólafsson er enn í fyrsta sæti eftir að 1400 atkvæði hafa verið talin. Hann er með 688 atkvæði. Gunnar Birgisson er hins vegar með 601 atkvæði í fyrsta sæti og er ljóst að Ármann hefur aukið nokkuð forskot sitt á Gunnar frá því að fystu tölur birtust.

Ármann í fyrsta sæti

Ármann Kr. Ólafsson er í fyrsta sæti í prófkjöri Sjálfstæðisflokksins í Kópavogi eftir að 500 atkvæði hafa veirð talin. Gunnar Birgisson er í þriðja sæti og Hildur Dungal í öðru.

Háspennubilun í Hlíðarhverfi

Rafmagn er komið aftur á í Hlíðahverfi en þar varð háspennubilun fyrr í dag og varð rafmagnslaust fyrir vikið í Hlíðahverfi, Öskjuhlíð, Skógarhlið og þar um kring.

Rík ástæða til að fara yfir gagntilboðið

„Við áttum ágætan fund. Við fengum samninganefndina inn á fundinn með okkur og ræddum þetta, innihaldið og okkar viðbrögð,“ segir Steingrímur J. Sigfússon fjármálaráðherra.

Fjögur skip á loðnuveiðum í dag

Að minnsta kosti fjögur skip hafa verið við loðnuveiðar í dag rétt austan við Vestmannaeyjar. Flestar torfurnar eru á bili sem nær frá Bjarnarey austur að Háfadýpi en þar er loðnan þéttust. Loðnan er á hægri göngu vestur á bóginn.

Komu saman til kröfufundar á Austurvelli

Hópur fólks kom saman á Austurvelli í dag á ellefta kröfufundi vetrarins. Aðstandendur mótmælanna, samtökin Nýtt Ísland, telja að um 1500 manns hafi verið saman komin. Lögreglan gat þó ekki staðfest þann fjölda.

Tveir stórir skjálftar í Vatnajökli

Tveir nokkuð snarpir jarðskjálftar mældust við Bárðarbungu í Vatnajökli klukkan þrjú í dag. Annar mældist 4,3 á Richter en hinn 3,5. Upptök stærri skjálftans voru 9,6 kílómetrum nor-norðaustur af Bárðarbungu en minni skjálftinn átti upptök sín 9,2 km aust-norðustur af Bárðarbungu.

Fundað á næstu mínútum

Fundur forystumanna ríkisstjórnarinnar með forystum stjórnarandstöðunnar mun hefjast innan klukkustundar samkvæmt heimildum fréttstofu. Þar mun verða farið yfir gagntilboðið sem Hollendingar sendu Íslendingum fyrr í dag.

Tilboð komið frá Hollandi

Samninganefnd Íslands í Icesave viðræðunum við Breta og Hollendinga fer þessa stundina yfir gagntilboð sem barst fyrir stuttu frá Hollandi. Ekki er ljóst á þessari stundu hvort um sameiginlegt gagntilboð þjóðanna er að ræða. Reiknað er með að forystumenn stjórnmálaflokkanna komi saman til fundar síðar í dag til að ræða tilboðið.

Fyrrverandi klámmyndastjarna brast í grát við að hlusta á Tiger

Joslyn James, fyrrverandi klámmyndastjarnan brast í grát í gær þegar kylfingurinn Tiger Woods baðst opinberlega afsökunar á framhjáhaldi sínu. James er ein af þeim 12 konum sem er sögð hafa átt vingott við Woods.

Allt flug Icelandair gæti stöðvast

Allt flug Icelandair til og frá landinu stöðvast eftir þrjátíu og sex klukkustundir náist ekki samningar milli flugvirkja og viðsemjenda þeirra. Verkfall hefði ekki áhrif á starfsemi Iceland Express þar sem flugvirkjar þess félags eru á verktakasamningum.

Vopnað rán í 10/11

Tilkynnt var um vopnað rán í 10/11 verslun í Álfheimum, Glæsibæ klukkan tuttugu mínútur í tíu í morgun.

Afla upplýsinga um áhrif stjórnarkreppunnar á Icesave

Fjármálaráðuneytið reynir að afla sér upplýsinga um áhrif stjórnarkreppunnar í Hollandi á viðræður Hollendinga og Breta um lausn Icesavedeilunnar við Íslendinga. Í gær var boðað að gagntilboð við hugmyndum Íslendinga bærist í dag en það hafði ekki gert það nú fyrir hádegi.

Skipulagsbreytingar á RÚV

Skipulagsbreytingar standa yfir á yfirstjórn RÚV. Til stendur að sameina innlenda dagskrárdeild sjónvarps og innkaupadeild fyrir erlent efni. Þá verður ráðinn mannauðsstjóri í fyrirtækinu.

Háskólar kynna starfsemi sína í dag

Í dag kynna háskólar landsins námsframboð sitt fyrir næsta skólaár. Kynningin fer fram á tveimur stöðum í borginni.

Þrjú prófkjör í dag

Prófkjör Sjálfstæðisflokksins í Kópavogi fer fram í dag en kjörfundur hefst klukkan 10 og lýkur klukkan 18. Kosið verður í félagsheimili flokksins að Hlíðarsmára 19. Gunnar I. Birgisson og Ármann Kr. Ólafsson berjast um fyrsta sætið í prófkjörinu en búast má við fyrstu tölum uppúr klukkan sjö.

Ríkisstjórn Hollands fallin

Verkamannaflokkur Wouter Bos fjármálaráðherra Hollands gekk úr ríkisstjórn landsins eftir sextán klukkustunda maraþonfund ríkisstjórnarinnar sem lauk í nótt. Verkamannaflokkurinn gat ekki sætt sig við áframhaldandi þátttöku Hollendinga í hernaði vesturveldanna í suðurhluta Afganistans.

Endeavour á leið til jarðar

Geimferjan Endeavour hélt til jarðar frá alþjóðlegu geimstöðinni í gær eftir tíu daga dvöl í geimnum. Geimfararnir fluttu síðasta stóra hlutann í geimstöðina og hjálpuðu íbúum hennar við að tengja hann við stöðina.

Tveir snarpir skjálftar við Vatnajökul í morgun

Tveir nokkuð snarpir jarðskjálftar urðu við Vatnajökul rétt fyrir klukkan sex í morgun.

Bátur sökk í Þorlákshöfn

Aðalbjörgin, 100 tonna stálbátur, sökk við bryggjuna í Þorlákshöfn í morgun.

Laminn með flösku í höfuðið

Ein líkamsárás í miðbænum var kærð til lögreglunnar á höfuðborgarsvæðinu í nótt. Karlmaður var laminn með flösku í höfuðið. Hann fékk skurð og var færður á slysadeild. Alls voru vistaðir sjö aðilar í fangageymslum eftir nóttina, sem lögreglan segir þó að hafi verið frekar róleg. Brotist var inn í eina bifreið við Reynihvamm, þaðan tekið Garmin leiðsögutæki. Dekkjum var stolið undan bifreið við Funahöfða og náðust tveir aðilar á hlaupum frá vettvangi.

Misvísandi dómar skapa réttaróvissu

Misvísandi dómar Hæstaréttar hafa valdið réttar­óvissu þegar kemur til kasta héraðsdómstóla að dæma í brotamálum gegn lögreglumönnum. Tveimur málum af fjórum, af þessum toga, hefur Hæstiréttur nýlega vísað frá, þar sem þau voru rannsökuð í umdæmum lögreglumannanna sem brotið var á. Í hinum tveimur, sem einnig voru rannsökuð í umdæmi brotaþola, dæmdi Hæstiréttur.

Höfuðpaur fékk tæp fjögur ár

Fimm ungir menn hafa verið dæmdir í Héraðsdómi Reykjavíkur í samtals átta ára og fimm mánaða fangelsi fyrir að reyna að smygla til landsins um fjórum kílóum af amfetamíni, sem þeir höfðu falið í pakka í málningarfötum.

Börn með fæðingargalla búa við misrétti í læknisþjónustu

Reglugerðir sem heilbrigðisráðherra setti um áramót og fjalla um endurgreiðslur vegna tannréttinga og aðgerða í gómi barna með skarð í vör og gómi hafa valdið foreldrum barnanna miklum vonbrigðum.

Hundruð horfa á norðurljósin

Milli þrjú og fjögur hundruð erlendir ferðamenn nutu norðurljósadýrðar fyrir austan fjall á sunnudagskvöld. Skilyrði hafa verið einstaklega góð að undanförnu, að sögn Þóris Garðarssonar hjá Allrahanda.

Tóku tæp þrjátíu kíló af fíkniefnum

„Sá góði árangur sem náðst hefur á Suðurnesjum við töku fíkniefna sem reynt hefur verið að smygla til landsins í gegnum Keflavíkurflugvöll byggist meðal annars á góðri samvinnu lögreglu og tollgæslu,“ segir Sigríður Björk Guðjónsdóttir, lögreglustjóri á Suðurnesjum.

Kolkrabbarnir gleðja gestina

Fjórir kolkrabbar komu á Fiskasafnið í Vestmannaeyjum um miðja viku. Einn þeirra er sá stærsti sem komið hefur á safnið, á bilinu 60 til 70 sentímetra langur. Hann hefur fengið nafnið Vídalín, enda veiddur af skipverjum á Jóni Vídalín.

Lýsing stöðvar yfirtöku erlendra lána

Nýir lánasamningar eða yfirtökur á bílalánasamningum í erlendri mynt voru stöðvaðir hjá fjármögnunarfyrirtækinu Lýsingu eftir dóm Héraðsdóms Reykjavíkur um myntkörfulán fyrir viku. Halldór Jörgensson, framkvæmdastjóri Lýsingar, segir ákvörðunina meðal annars hafa verið tekna af ótta við að braskarar sættu lagi eftir dóminn.

Komið verði á móts við hópinn

Álfheiður Ingadóttir heilbrigðisráðherra hefur falið lögfræðingum ráðuneytisins að leita leiða til þess að börn með skarð í vör og góm njóti sömu réttinda og börn sem fæðast með annars konar fæðingargalla. Það er að segja að allur kostnaður við aðgerðir sem börnin þurfa að fara í, þar með talinn kostnaður við tannréttingar og tannlækningar, verði þeim að kostnaðarlausu.

Erfitt að átta sig á stöðunni

Eigið fé BM Vallár, sem óskaði eftir greiðslustöðvun í byrjun mánaðar, var neikvætt um þrjá milljarða króna um síðustu áramót. Óskar Sigurðsson, aðstoðarmaður félagsins í greiðslustöðvun, segir ekki útilokað að staðan sé verri.

Vilja hjálp frá Byggðastofnun

„Bæjarstjórn Ísafjarðarbæjar hvetur stjórnvöld til að tryggja skelrækt það starfsumhverfi sem hún þarf til að geta dafnað." Á fréttavef Bæjarins besta á Ísafirði, bb.is, er frá því greint að tillaga þessa efnis hafi verið lögð fram af Í-listanum á bæjarstjórnarfundi á fimmtudag og verið samþykkt samhljóða.

Samkeppni um SMS-lánin

Að minnsta kosti tvö fyrirtæki bjóða nú upp á svokölluð SMS-lán hér á landi, og fleiri hyggjast hasla sér völl á þessum markaði. Fyrirtækið Hraðpeningar tók til starfa í vikunni, en fyrir var smálánafyrirtækið Kredia.

Brotinn eftir átök á pitsustað

Átök brutust út meðal tveggja starfsmanna pitsu­staðar í Breiðholti í hádeginu í fyrradag sem leiddu til þess að annar þeirra handleggsbrotnaði.

Sóttu tvö lömb

Bændur í nágrenni Blönduóss björguðu í vikunni tveimur lömbum úr sjálfheldu úr svonefndu Draugagili. Þeir sigu eftir lömbunum en þau höfðu orðið viðskila við fjárhóp í fyrrasumar.

Brátt tilbúin á Japansmarkað

Hrognavinnsla úr loðnu hófst á fimmtudag hjá Ísfélagi Vestmannaeyja þegar Álsey, skip Ísfélagsins, landaði um 1.000 tonnum af loðnu, og var vinnslan í fullum gangi í gær þegar ljósmyndari Fréttablaðsins leit við.

Sjötta moskan skemmd á árinu

Spellvirkjar unnu skemmdarverk á mosku í bænum Sorgues í Frakklandi um helgina. Þeir skrifuðu rasískar svívirðingar á veggi moskunnar. Þetta er sjötta moskan í Frakklandi sem skemmdarverk hafa verið unnin á það sem af er ári.

Nýja stjórnin lofar lýðræði

Bráðabirgðastjórn herforingja í Níger, sem tóku völdin í landinu á fimmtudag, lofar því að koma á lýðræði og frjálsum kosningum.

Bensínþurrð í Grikklandi

Bensínstöðvar á Grikklandi eru óðum að tæmast af bensíni og olíu vegna verkfalls tollvarða, sem hefur nú verið framlengt fram á miðvikudag þegar helstu verkalýðsfélög landsins efna til allsherjarverkfalls.

Hamas ásakar Fatah og öfugt

Hamashreyfing Palestínumanna á Gasasvæðinu fullyrti í gær að tveir Palestínumenn, sem tóku þátt í morðinu á háttsettum Hamasliða í Dúbaí í síðasta mánuði, hafi verið fyrrverandi yfirmenn í Fatah-samtökunum. Talsmaður Fatah sagði ekkert hæft í þessu, en gaf í skyn að Palestínumennirnir tveir hafi hugsanlega verið liðsmenn Hamas.

Átta fengu að fara heim

Átta bandarískir trúboðar voru látnir lausir úr fangelsi á Haíti í vikunni og komu heim til Bandaríkjanna á fimmtudag. Tveir aðrir eru þó enn í haldi á Haítí og fyrrverandi lögmaður hópsins er eftirlýstur í Bandaríkjunum og víðar.