Enn einnar vændiskonu saknað í Ipswich

Enn einnar stúlku er saknað í Ipswich á Suðaustur-Englandi, þar sem svo virðist sem óhugnanlegur raðmorðingi leiti til fordæmis Kobba kviðristu og herji á vændiskonur. Síðan 2. desember hafa fimm kvenmannslík fundist á víðavangi á Suffolk-svæðinu, allt vændiskonur sem hafa horfið sporlaust af götunum.

Prófkjörsfrestur liðinn hjá Framsókn í Suðurkjördæmi

Prófkjörsfrestur hjá Framsóknarflokkinum í Suðurkjördæmi rann út í dag klukkan 17:00. 12 gefa kost á sér, þar af koma fjórir frá Árborg en tveir frá Reykjanesbæ. Aðeins einn er frá Vestmannaeyjum. Prófkjörið fer fram þann 20. janúar á næsta ári.

Ætla bara að ráðast á eþíópísku hermennina

Leiðtogi Íslömsku bardagasveitanna í Sómalíu, segist ekki hafa í hyggju að ráðast á bráðabirgðaríkisstjórn Austur-Afríkuríkisins, heldur eingöngu "innrásarsveitir" grannríkisins Eþíópíu. Hassan Dahir Aweys, sjeik, kallaði ásakanir Bandaríkjamanna á þá leið að samtök hans séu í raun leppsamtök Al Kaída í Sómalíu, innantómt raus.

Staðfest gæsluvarhald yfir síbrotamanni

Hæstiréttur staðfesti í dag gæsluvarðhaldsúrskurð héraðsdóms yfir síbrotamanni sem nýlega var dæmdur í 5 ára fangelsi. Hann mun sitja í gæsluvarðhaldi allt til mánudagsins 10. janúar, eða meðan hæstiréttur rannsakar mál hans. Hann er ákærður fyrir röð minniháttar afbrota.

Gæsluvarðhald staðfest yfir dæmdum nauðgara

Hæstiréttur Íslands staðfesti í dag gæsluvarðhaldsúrskurð yfir Edward Koranteng, karlmanni á þrítugsaldri, en maðurinn er kærður fyrir að nauðga þrettán ára stúlku í lok nóvember. Maðurinn var í vikunni dæmdur fyrir að nauðga annarri fjórtán ára stúlku á síðasta ári.

Gleðileg jól

Ávirðingar hlaðast upp á nýjan ráðherra

Carina Christensen, hinn nýi fjölskyldu- og neytendaráðherra Danmerkur, náði ekki að klára einn dag í embætti áður en fjölmiðlar voru búnir að grafa upp meintar ávirðingar á hana. Christensen, sem er 34 ára gömul á og rekur húsgagnaverksmiðju á Fjóni.

Guðni sakar Hjálmar um að ganga á bak orða sinna

Guðni Ágústsson, varaformaður Framsóknarflokksins og landbúnaðarráðherra, segir framboð Hjálmars Árnasonar í fyrsta sæti í prófkjöri Framsóknarflokksins í Suðurkjördæmi hafa komið sér algjörlega í opna skjöldu. Guðni sakar Hjálmar um að hafa gengið á bak orða sinna því fyrir um mánuði hafi hann lýst yfir stuðningi við Guðna í fyrsta sæti.

Íþróttahúsið við MS og Vogaskóla opnað aftur

Íþróttahús Menntaskólans við Sund og Vogaskóla hefur verið opnað aftur. Heilbrigðiseftirlitið stöðvaði starfsemi íþróttahússins eftir alvarlegar athugasemdir við ófullnægjandi þrif og öryggisþætti.

Minna hlutfall ráðstöfunartekna fer í mat

Hlutdeild matvæla í heimilisútgjöldunum fer stöðugt lækkandi. Á tímabilinu 2002-2004 fóru 14,4% ráðstöfunartekna heimilanna í þennan lið, en á tímabilinu sem rannsóknin nær til, fóru aðeins 12,9% til kaupa á matvörum og óáfengum drykkjarvörum. Húsnæði, hiti og rafmagn er sem fyrr lang fjárfrekasti liðurinn og sá sem hækkar mest.

Samningur um raforku tilbúinn eftir tvær vikur

Vonast er til að samningur milli Landsvirkjunar og Alcan um raforkuverð vegna hugsanlegrar stækkunar álversins í Straumsvík verði tilbúinn eftir tvær vikur. Samninganefndir fyrirtækjanna eru nú langt komnar með að ganga frá samningi.

Flotadeild til höfuðs flóttamönnum

Leiðtogar Evrópusambandsins hafa samþykkt að stofna sérstaka flotadeild til þess að koma í veg fyrir að ólöglegir inn flytjendur frá Afríku nái að suðurströndum aðildarríkjanna. Einnig verður stofnuð viðbragðssveit landamæravarða sem hægt er að senda á vettvang með litlum fyrirvara.

ASÍ stendur við bókaverðkönnun sína

Alþýðusamband Íslands hefur farið yfir framkvæmd sína á verðkönnun á bókum sem Bónus gagnrýndi harðlega í gær. Niðurstaða ASÍ er sú, að eðlilega hafi verið staðið að framkvæmdinni og Alþýðusambandið stendur við könnunina.

Vilja stöðva efnistöku á botni Hvalfjarðar

Sveitastjórn Hvalfjarðasveitar vill að efnistaka á sjávarbotni Hvalfjarðar verði stöðvuð vegna umhverfisspjalla. Starfsleyfi fyrirtækisins Björgunar, til efnisöflunar í Hvalfirði, rann út árið 2005 en fyrir skömmu var ákveðið að veita fyrirtækinu bráðabrigða starfsleyfi til ársins 2008.

Landsvirkjun lýsir yfir áhyggjum af slysum við Kárahnjúka

Stjórn Landsvirkjunar lýsir yfir áhyggjum af fjölgun vinnuslysa sem orðið hafa hjá verktakafyrirtækinu Impregilo sem sinnir framkvæmdum við Kárahnjúka. Hún leggur áherslu á að öryggismál á svæðinu séu í góðu lagi og gerir kröfu til verktaka og framkvæmdaeftirlits að fylgja því eftir.

Offita að setja Bretland á hausinn

Læknar í bresku heilbrigðisþjónustunni segja að sívaxandi offita þjóðarinnar, geti gert þjónustuna gjaldþrota á næstu árum. Samkvæmt nýjustu tölum er offita meiri í Bretlandi en nokkru öðru Evrópuríki. Þar er einn af hverjum fimm fullorðnum of þungur, og læknarnir segja að það geti farið upp í einn af hverjum þremur, ef ekkert verði að gert.

Tvítug kona í dæmd í fjögurra mánaða fangelsi

Rúmlega tvítug kona var í dag dæmd í Héraðsdómi Reykjavíkur í fjögurra mánaða fangelsi meðal annars fyrir líkamsárás og þjófnað. Í maí á þessu ári braust konan inn í íbúð á Suðurlandsvegi og reyndi að stela þaðan ýmsum hlutum.

Tekinn ölvaður undir stýri í annað skiptið á einni viku

Lögreglan í Reykjavík stöðvaði á síðasta sólarhring ökumann í annað skiptið á innan við viku fyrir ölvunarakstur. Alls hefur lögreglan í Reykjavík stöðvað tólf ökumenn fyrir ölvunarakstur síðastliðinn sólarhring. Sá yngsti er 17 ára en sá elsti hátt á áttræðisaldri.

Í værum svefni

Breskur kaupsýslumaður hefur verið dæmdur til 180 klukkustunda samfélagsþjónustu og til að greiða sjötíu og fimm þúsund króna sekt fyrir að tefja lestarsamgöngur í grennd við borgina Epsom í suðurhluta landsins.

Bílastæði opnuð á Faxaskálasvæðinu

Steyptur grunnur á Faxaskálasvæðinu verður nýttur tímabundið undir bílastæði. Bílastæðum á svæðinu hefur fækkað frá því að framkvæmdir hófust við gerð lóðar tónlistar- og ráðstefnuhúss við austurhöfn Reykjavíkur.

Stólalyftan í Suðurgili opin í Bláfjöllum á morgun

Á morgun verður Gosinn stólalyftan í Suðurgili í Bláfjöllum opin frá klukkan eitt eftir hádegi til klukkan fjögur. Snjór er í lágmarki og víða grunnt á grjót og því mun ekkert kosta inn á svæðið.

Veiðiþjófur skotinn

Þjóðgarðsverðir í Kenya skutu í gær til bana illræmdan veiðiþjóf frá Sómalíu, sem vitað er að hafði drepið sautján fíla og níu nashyrninga á síðustu fimm árum. Það er ekki óalgengt í Afríku að þjóðgarðisverðir lendi í skotbardögum við veiðiþjófa.

Sjúkraliðar vilja leiðréttingu launa sinna

Sjúkraliðar á Hrafnistu í Hafnarfirði skora á stjórnendur á Hrafnistu að leiðrétta laun þeirra. Sjúkraliðarnir benda á að mikil undirmönnun hafi verið um langt skeið og það valdi miklu álagi á starfsmenn.

Forsetakosningar í Rússlandi 2. mars 2008

Ákveðið hefur verið að flýta forsetakosningum sem fram eiga fara í Rússlandi 2008 um viku. Það er gert vegna þess að almennan frídag ber upp á daginn fyrir kosningarnar.

Svaf vært á teinunum

Breskur maður á yfir höfði sér allt að sex mánaða fangelsisdóm eftir að hann sofnaði á lestarteinum fyrr á þessu ári.

Átök á milli Hamas og Fatah á heimastjórnarsvæðum í morgun

Liðsmenn Hamas saka Fatah-hreyfinguna um að hafa sýnt Ismail Haniyeh, forsætisráðherra palestínsku heimastjórnarinnar, banatilræði við landamærin að Gaza í gærkvöld. Til átaka kom á milli liðsmanna Hamas og Fatah á heimastjórnarsvæðum Palestínumanna í morgun.

Umferðaróhapp undir Hafnarfjalli

Umferðaróhapp varð fyrir um hádegi á Vesturlandsvegi í Hafnarskógi. Lögreglunni í Borgarnesi er ekki kunnugt um slys á fólki.

Stefnir í að flug lamist um áramót

Allt stefnir í að flug lamist hér á landi og á milli landa um áramót. Flugstoðir, sem taka við flugstjórninni um áramót, hafa sett flugumferðarstjórum skilyrði um að undirrita starfsmannasamninga fyrir klukkan þrjú í dag, ella sé félagið ekki bundið af neinum samningum við þá. Flugumferðarstjórar ætla ekki að að undirrita samninginn.

Framboð til að vinna að velferðarmálum aldraðra

Tillaga að framboði eldri borgara til Alþingis til að vinna að velferðarmálum aldraðra var samþykkt með miklum meirihluta atkvæða á fundi Félags eldri borgara í Reykjavík í gærkvöldi.

Samkomulag um raforkusölu til Alcan kynnt á fundi Landsvirkjunar

Samkomulag um raforkusölu til stækkunar álvers Alcan í Straumsvík var kynnt á síðasta stjórnarfundi sameignarfyrirtækis Reykjavíkurborgar, Akureyrarbæjar og ríkisins um Landsvirkjun, sem haldinn var í dag.

Hjálmar vill standa í brúnni

Hjálmar Árnason, þingmaður Framsóknarflokksins, segir engan eiga neitt í pólitík og því líti hann ekki á sem svo að hann sé að fara gegn Guðna í prófkjöri framsóknarmanna í Suðurkjördæmi. Hann sé búinn að vera fyrsti stýrimaður í tólf ár og vilji nú athuga hvort að fyrsti stýrimaður fái ekki að fara eins og einn róður.

Nýr miðbæjarkjarni rís í Garðabæ

Nýr miðbæjarkjarni rís í Garðabæ á næstu þremur til fjórum árum. Byggð verða þriggja hæða íbúðahús með risi og verslunum á jarðhæð, sem ásamt nýju Hönnunarsafni Íslands mynda hring umhverfis nýtt Garðatorg. Bílakjallari verður undir torginu. Samningur á milli Garðabæjar og Klasa hf. um uppbyggingu nýja miðbæjarins var undirritaður á Garðatorgi í hádeginu.

Hjálmar Árnason fer gegn Guðna Ágústssyni

Hjálmar Árnason þingflokksformaður Framsóknarflokksins ætlar að bjóða sig fram gegn Guðna Ágústssyni, varaformanni flokksins, í efsta sætið á lista flokksins í Suðurkjördæmi. Þetta kom fram á vef Víkurfrétta nú laust fyrir hádegi.

Auglýsa með nafni eftir manni vegna morða á vændiskonum

Breska lögreglan hefur auglýst, með nafni, eftir eiganda BMW bifreiðar, í tengslum við morðin á fimm vændiskonum í Ipswich. Maðurinn er einn af þúsundum farandverkamanna frá Austur-Evrópu sem koma til Suffolk ár hvert til þess að vinna í landbúnaði. Hann hefur ekki sést síðan á miðvikudag.

Þrjú þúsund og sex hundruð ótryggð ökutæki í umferð

Rúmlega þrjú þúsund og sex hundruð ótryggð ökutæki eru í umferð á Íslandi. Þar af eru um tvö þúsund og fimm hundruð þeirra fólksbifreiðar. Samkvæmt upplýsingum frá Umferðarstofu eru tæplega hundrað sjötíu og sjöþúsund fólksbílar í umferð á Íslandi en tæplega níu prósent þeirra eða um fimmtán þúsund eru óskoðaðir.

100 hafa sótt starfstengt íslenskunám á Landspítalanum

Um hundrað erlendir starfsmenn á Landspítalanum hafa á þessu ári sótt starfstengd íslenskunámskeið á spítalanum, en alls vinna um 250 erlendir ríkisborgarar á spítalanum.

Óttast grímulaust stríð milli Hamas og Fatah

Palestínumenn úr Hamas og Fatah samtökunum hafa í morgun barist bæði á Gaza ströndinni og Vesturbakkanum. Hamas sakar Fatah um að hafa í gær reynt að myrða Ismail Haniyeh, forsætisráðherra palestinsku ríkisstjórnarinnar. Einn lífvarða hans féll í átökunum.

Ísland tekur upp stjórnmálasamband við Búrúndí

Búrúndí hefur nú bæst hóp þeirra ríkja sem eru í stjórnmálasambandi við Íslands. fastafulltrúar landanna hjá Sameinuðu þjóðunum undirrituðu í New York í gær yfirlýsingu þar um. Þetta kemur fram á vef utanríkisráðuneytisins.

Stærsta Vodafone-verslun í heimi opnuð

Vodafone á Íslandi opnaði verslun í Skútuvogi í morgun sem fyrirtækið segir stærstu Vodafone verslun í heimi. Verslunin er um 400 fermetrar að stærð og sú eina sinnar tegundar hér á landi sem býður alvöru símtæki til þess að prófa og skoða.

Kona nýr neytendaráðherra Danmerkur

Nýr ráðherra fjölskyldu- og neytendamála, í Danmörku, verður hin 34 ára gamla Carin Christensen, sem kemur úr röðum íhaldsmanna. Christensen er sögð í miklu uppáhaldi hjá flokksforystunni, og eiga góðan frama fyrir sér í stjórnmálum.

Ekkert aðhafst vegna máls gegn SHH

Samkeppniseftirlitið telur ekki ástæðu til að mæla fyrir um fjárhagslegan aðskilnað innan Samskiptamiðstöðvar heyrnarlausra og heyrnarskerta eins og óskað var eftir í erindi til stofnunarinnar.

Ljósahús Reykjanesbæjar eru Týsvelli 1

Týsvellir 1 voru í gær valdir Ljósahús Reykjanesbæjar 2006. Viðurkenningar fyrir ljósahús voru veittar í Bíósal Duushúsa í gærkvöldi. Í öðru sæti var Borgarvegur 25 og í því þriðja Bragavellir 3.

FL Group selur hlut sinn í Straumi

FL Group hefur samþykkt að selja 22,6 prósent hlut sinn í Straumi-Burðarási Fjárfestingarbanka hf. til bankans sjálfs og viðskiptavina hans. Kaupendur greiða 18 krónur fyrir hvern hlut og nemur verðið 42,1 milljarði króna.

Kaup Pennans á tveimur bókaverslunum samþykkt

Samkeppniseftirlitið telur ekki ástæðu til að aðhafast neitt vegna kaupa Pennans á Bókaverslun Jónasar Tómassonar á Ísafirði og Bókaversluninni Andrés Níelsson á Akranesi.

20 Hollendingar rannsakaðir vegna geislaeitrunar