Flugfært til Bandaríkjanna

Flugvél Icelandair lagði af stað frá Keflavíkurflugvelli til Bandaríkjanna síðdegis í gær. Hún flutti og sótti farþega sem áttu pantað flug milli landanna á sunnudag en því hafði verið aflýst vegna óveðurs.

Viðbúnaðarstig fyrir vestan

Viðbúnaðarstigi vegna hláku sem eykur hættu á snjóflóðum hefur verið lýst yfir í byggðum á norðan- og sunnanverðum Vestfjörðum. Fylgst er með ástandinu.

Halldór neitar ásökunum

Halldór Ásgrímsson forsætisráðherra þvertekur fyrir að málflutningur hans um þá ákvörðun að setja Ísland á lista hinna staðföstu þjóða í Íraksstríðinu hafi verið villandi. Hann segir utanríkismálanefnd Alþingis frjálst að birta það sem hún vill varðandi málið. 

Kostaboð verslana standast ekki

Svo virðist sem auglýst kostaboð raftækjaverslana eigi ekki ávallt við rök að styðjast. Í auglýsingabæklingi ELKO, sem datt inn á borð landsmanna í byrjun árs, má finna verðupplýsingar sem hreinlega standast ekki.

Gígarnir í Eyjum skemmdir

Unnar hafa verið skemmdir á gosgígunum í Vestmannaeyjum með skurðgröfu. Gígarnir mynduðust í gosinu árið 1973 og eru á náttúruminjaskrá. Ráðist var í þessar óvæntu framkvæmdir á 31 árs afmæli gossins.

Mannskaðaveður í V-Evrópu og BNA

Mannskaðavetrarveður hefur gengið yfir bæði Vestur-Evrópu og Bandaríkin síðustu daga. Grenjandi stórhríð, hálasvell og snjóflóð hafa teppt samgöngur og gert mörgum gramt í geði.

Bandarískir hermenn á nálum

Gríðarleg spenna liggur í loftinu í Írak nú þegar aðeins sex dagar eru í þingkosningar. Bandarískir hermenn í landinu eru á nálum því að árásir andspyrnumanna eru eins og rigningin: maður veit aldrei hvar hún lendir. Þetta segir sjónvarpsmaðurinn Jón Ársæll Þórðarson sem er á ferð með bandaríska hernum í Írak.

Vilja breyta lögum um eftirlaun

Forsætisráðherra vill breyta lögum um eftirlaun æðstu embættismanna ríkisins þannig að ekki verði lengur unnt að starfa á fullum launum og þiggja um leið eftirlaun. Guðmundur Árni Stefánsson, eini stjórnarandstæðingurinn sem studdi eftirlaunafrumvarpið, er sammála þessu. 

Fresta afhendingu olíuyfirlits

Starfsfólk Essó neitaði í liðinni viku viðskiptavinum sínum um yfirlit yfir viðskipti þeirra við félagið undanfarin ár. Töluvert var um að fólk óskaði eftir upplýsingunum eftir að Neytendasamtökin hvöttu almenning til að afhenda samtökunum nótur vegna olíukaupa. Það var gert vegna fyrirhugaðrar skaðabótakröfu sem rekin verður fyrir dómstólum.

Vilja selja refaveiðileyfi

Hugmyndir eru um það í Skagafirði að selja skotveiðimönnum leyfi til refaveiða í sveitinni. Jón Garðarsson, fulltrúi Framsóknarflokks í atvinnu- og ferðamálanefnd Skagafjarðar, kynnti þessar hugmyndir á fundi nefndarinnar í liðinni viku.

Nýbyggingar í undirbúningi

Engilbert Runólfsson, eigandi verktakafyrirtækisins Stafna á milli, hefur keypt fjölda húsa frá horni Laugavegs, niður Frakkastíg og niður á Hverfisgötu. Þar ætlar fyrirtækið að reisa fimmtán þúsund fermetra nýbyggingu sem í verða bæði íbúðir og verslunarhúsnæði, en sex þúsund fermetrar fara undir bílageymslu.

Eldur í vél

Eldur kom upp við húsnæði Ísafoldarprentsmiðjunnar í gær. Slökkvilið höfuðborgarsvæðisins, sem er með slökkvistöð í grennd við prentsmiðjuna, náði að slökkva eldinn áður en hann breiddist út.

Lögbann á starfsmenn

Fjórum af fimm fyrrverandi starfsmönnum SÍF sem sögðu upp störfum fyrir áramót og stofnuðu eigið fisksölufyrirtæki hefur verið meinað að starfa fyrir nýja félagið eða taka á nokkurn annan hátt í starfsemi félagsins til 30. júní.

Kjarabætur stóðu ekki til

Forsætisráðherra segir að mönnum hafi sést yfir þann möguleika að fyrrverandi ráðherrar gætu þegið eftirlaun á sama tíma og þeir gegndu starfi á vegum hins opinbera. Hann segir ástæðu til að taka málið til athugunar. </font /></b />

Hús rýmd

Fjögur hús voru rýmd á Bíldudal seint í gærkvöld vegna snjóflóðahættu. Lögreglan á Patreksfirði segir að húsin séu við Gilsbakkagil og gripið hafi verið til þessa af öryggisástæðum.

DNA-próf til að sanna skyldleika

Hælisleitendum í Danmörku verður gert skylt að undirgangast DNA-próf til að sanna skyldleika við börn sem þeir flytja með sér, verði hugmynd danska þjóðarflokksins að veruleika. Samkvæmt stikkprufum sem eru gerðar í dag eru börn flutt til landsins með öðrum en líffræðilegum foreldrum sínum í þriðja hvert skipti.

Krefst 94 milljóna af Arngrími

Arngrími Jóhannssyni, stjórnarformanni Atlanta, hefur verið stefnt af eiganda Scandinavian Historic Flight vegna vanefnda á samningi. Stefnufjárhæðin nemur tæplega 94 milljónum króna.

Borgarfulltrúar leiti sér sálfræðihjálpar

Formaður bæjarráðs Kópavogs segir að vegna minnimáttarkenndar gagnvart Kópavogi ættu borgarfulltrúar R-listans kannski að leita sér sálfræðihjálpar. Reykjavíkurborg meinar Kópavogi að leggja vatnsleiðslu um land sitt. Iðnaðarráðuneytið er með málið til skoðunar. </font /></b />

Sagður hafa samið við skæruliða

Ísraelsk stjórnvöld segja Mahmoud Abbas, forseta Palestínu, hafa náð vopnahléssamkomulagi við skæruliða- og hryðjuverkahreyfingar Palestínumanna. Talsmenn samtakanna harðneita þessu og segjast ekki útiloka neinar aðgerðir fyrr en Ísraelsmenn hætti sjálfir hernaðaraðgerðum sínum. Talsmaður Abbas neitaði að tjá sig um málið.

Gripinn við þjófnað á næturklúbb

Tæplega fertugur maður var staðinn að verki þegar hann reyndi að hnupla úr peningakassa á næturklúbbnum Casino í Keflavík í nótt. Að sögn lögreglu kom starfsfólk að manninum fyrir innan barborð og var hann þá búinn að opna peningakassa og taka úr honum 4500 krónur. Maðurinn var tekinn til yfirheyrslu hjá lögreglu.

Óku fram á sofandi mann

Lögreglan í Keflavík ók í nótt fram á mann sem lá steinsofandi úti á götu. Maðurinn lá sofandi á Kirkjuvegi í Keflavík og var orðinn kaldur. Þegar reynt var að vekja hann kom í ljós að hann var ofurölvi og gat vart mælt sökum ölvunar. Lögregla hlúði að honum og flutti hann í hlýja fangageymslu þar sem hans beið mýkri svefnstaður.

Herferð gegn þingkosningum í Írak

Abu Musab al-Zarqawi lýsti í nótt yfir stríði á hendur íröksku þingkosningunum sem fara fram eftir viku. Hótunin kom fram á hljóðupptöku sem birt var á íslamskri vefsíðu, en upptakan er sögð af ávarpi al-Zarqawis. Þar sagði hann að strítt yrði gegn lýðræði og hverjum þeim sem reyndi að koma því á fót.

Segir að árás á Íran væri mistök

Árás á Íran væri mikil mistök. Þetta segir utanríkisráðherra Írans. Á fréttamannafundi í Teheran kvaðst hann jafnframt telja líkurnar á slíkri árás afar litlar nema að einhverjum væri mikið í mun að gera hernaðarleg mistök.

Jeppi valt í Svínahrauni

Ökumaður og farþegar sluppu ómeiddir þegar jeppi valt út af þjóðveginum í Svínahrauni laust fyrir klukkan sex í gærkvöldi. Jeppinn valt skammt ofan Draugahlíðarbrekku austan við Litlu kaffistofuna, ekki fjarri skiltinu þar sem ökumenn eru minntir á fjölda látinna í umferðarslysum. Talið er að hálka hafi átt þátt í því að ökumaður missti stjórn á jeppanum.

Féll af flutningabíl og slasaðist

Rúmlega fertugur maður slasaðist í vinnuslysi við fiskvinnslufyrirtækið Vísi í Grindavík síðdegis í gær. Maðurinn féll af flutningabíl þegar verið var að færa farm til á bílnum. Hann var fluttur á Heilbrigðisstofnun Suðurnesja í Keflavík þar sem gert var að sárum hans en hann hafði hlotið skurð í andliti, samkvæmt upplýsingum lögreglunnar í Keflavík.

Vopnahléssamkomulag liggur fyrir

Vopnahléssamkomulag liggur fyrir milli palestínskra yfirvalda og skæruliðasamtaka á sjálfsstjórnarsvæðunum. Allir hlutaðeigandi neita þó fregnunum en talið er að betur horfi fyrir botni Miðjarðarhafs en í langan tíma.

Segjast ekki ráðast á Íran

Hyggi Bandaríkjamenn á innrás í Íran gætu þeir þurft að ráðast einir inn í landið. Bretar ætla sér ekki að taka þátt í hernaði gegn landinu en vilja semja við Írana um kjarnorkuvopnáætlun landsins.

Ný leyniþjónusta undir Rumsfeld

Nýrri leyniþjónustu hefur verið komið á fót innan bandaríska varnarmálaráðuneytisins. Bandarísk lög eru þar túlkuð með nýjum hætti til að veita Donald Rumsfeld varnarmálaráðherra völd til að skipa fyrir um leyniaðgerðir erlendis.

Júsjenko sver embættiseið

Viktor Júsjenko sór í morgun embættiseið sem forseti Úkraínu eftir langan aðdraganda. Mikil hátíðarhöld verða í Kænugarði af þessu tilefni, einkum á Sjálfstæðistorginu þar sem mótmælendur héldu til vikum saman til að knýja fram nýjar kosningar vegna kosningasvika í forsetakosningum á síðasta ári.

Óttast að neyðarfé sé sóað

Á Srí Lanka aukast áhyggjur af því að neyðarhjálp í formi fjár sé sóað í dularfull verkefni og í vasa spilltra stjórnmála- og embættismanna. Stjórnvöld í Kólombó vilja sem minnst segja um hvernig fénu er varið og halda samtökum og héraðsstjórnum fjarri þeirri ákvarðanatöku.

Stjórnarandstaðan á villigötum

Fréttir um að listi hinna staðföstu þjóða sé ekki lengur til undirstrikar á hvaða villigötum stjórnarandstaðan er í Íraksmálinu, að mati Sólveigar Pétursdóttur, formanns utanríkismálanefndar Alþingis. Hún segir stjórnarliða aldrei hafa efast um að rétt hafi verið staðið að ákvörðun um stuðning Íslands við innrásina í Írak.

Stormviðvörun á Vestfjörðum

Veðurstofan hefur gefið út stormviðvörun fyrir Vestfirði. Spáð er ört hlýnandi veðri á landinu samfara úrkomu og má búast við að snjóflóðahætta geti skapast. Í Reykjavík er búist við asahláku.

Aðför Fréttablaðsins að Halldóri

Páll Magnússon, varaþingmaður Framsóknarflokksins og aðstoðarmaður iðnaðar- og viðskiptaráðherra, segir að Fréttablaðið sé í herferð gegn Halldóri Ásgrímssyni, forsætisráðherra og formanni Framsóknarflokksins. Páll vísar þar til umfjöllunar Fréttablaðsins um aðdraganda Íraksstríðsins og veru Íslands á lista hinna staðföstu þjóða.

Meirihluti samþykki stuðning

Þingflokkur Samfylkingarinnar hefur samþykkt að flytja á Alþingi frumvarp til breytingar á stjórnarskrá Íslands sem hefur í för með sér að ríkisstjórn á hverjum tíma verði óheimilt að lýsa yfir aðild að eða stuðningi við stríðsaðgerðir nema með samþykki meirihluta Alþingis. Þetta kemur fram í fréttatilkynningu frá fyrsta flutningsmanni frumvarpsins, Helga Hjörvar.

Brenndu átta þorp í Darfur-héraði

Uppreisnarmenn réðust á og brenndu átta þorp í Darfur-héraði í Súdan í gær. Haft er eftir yfirmanni í her landsins að tugir hafi fallið í árásunum en uppreisnarmennirnir létu einnig greipar sópa í þorpunum.

Funda um ferðaþjónustuvanda

Forystumenn í ferðamálum í Asíu hittast í dag til þess að reyna að endurskipuleggja ferðaþjónustu í Suðaustur-Asíu í kjölfar hamfaranna annan dag jóla. Eftir að myndir af hamfarasvæðunum birtust í sjónvarpi um allan heim hafa fjölmargir hætt við ferðalög þangað og jafnvel á staði í Asíu sem eru hvergi nærri flóðasvæðunum.

Létust í snjóflóðum í Austurríki

Þrír erlendir skíðamenn hafa látist og eins er saknað eftir að tvö snjóflóð féllu í Austurríki um helgina. Tveir hinna látnu voru kanadískir ríkisborgarar en með þeim í för var Bandaríkjamaður sem enn er leitað í St. Anton í Týról. Þá lést þýsk-bandarískur snjóbrettamaður í snjóflóði sem féll í Vorarlberg í vesturhluta Austurríkis í gær.

Framsóknarmenn í ójafnvægi

"Mig undrar að Framsóknarmenn skuli kalla fréttaskrif Fréttablaðsins aðför að forsætisráðherra. Blaðið hefur ekki gert annað en segja fréttir af umræðunni dagana sem Halldór Ásgrímsson og Davíð Oddsson ákváðu stuðning Íslendinga við innrásina í Írak," sagði Sigurjón M. Egilsson, fréttaritstjóri á Fréttablaðinu, um fullyrðingar Páls Magnússonar, aðstoðarmanns iðnaðarráðherra, um að Fréttablaðið væri með aðför að Halldóri Ágrímssyni forsætisráðherra.

Þokast í samkomulagsátt

Palestínska sjónvarpið hafði eftir Mamhoud Abbas, forseta Palestínu, nú í dag að hann væri mjög nálægt því að semja við uppreisnarhópa í landinu um að hætta árásum á Ísraela. Fréttir hafa borist af því að vopnahléssamkomalag væri í sjónmáli en talsmenn Abbas hafa neitað að tjá sig um málið hingað til.

Tveir gripnir í áhlaupi lögreglu

Lögregla í Þýskalandi handtók tvo menn sem grunaðir eru um að skipuleggja hryðjuverkaárásir í Írak. Þeir voru gripnir í áhlaupi lögreglu á hús í borginni Mainz og er annar þeirra talinn vera háttsettur innan hryðjuverkasamtakanna al-Qaida.

Deiluaðilar funda í Finnlandi

Fulltrúar indónesískra stjórnvalda og uppreisnarmanna í Aceh-héraði munu hittast á fundi í Finnlandi í lok næstu viku til þess að reyna að binda enda á þriggja áratuga blóðuga baráttu á Súmötru. Það voru samtök sem Martti Ahtisaari, fyrrverandi forseti Finnlands, er í forsvari fyrir sem áttu frumkvæðið að fundinum og mun Ahtisaari sjálfur reyna að miðla málum.

Ofsaveður í Bandaríkjunum

Ofsaveður olli því að fella varð niður hundruð flugferða í Bandaríkjunum í dag og umferð á vegum gekk bæði hægt og illa. Stormviðvaranir voru í gildi frá Wisconson til Nýja-Englands og víða kyngdi niður allt að hálfum metra af snjó. Í stórum hluta Norðausturríkjanna var allt í lamasessi og í Miðvesturríkjunum var ástandið litlu skárra.

Brunagildran reist án leyfis

Ef húsið þar sem eldur varð laus á athafnasvæði Hringrásar hefði verið byggt eftir venjulegum leiðum hefði ekki þurft að fara eins og fór, segir brunamálastjóri. Lyftarahleðsla hefði verið í sérstöku brunahólfi. </font /></b />

Sérkennilegar kveðjur

Formaður skipulagsráðs Reykjavíkur segir lögnámsbeiðni Kópavogs vera ótímabæra og ummæli Gunnars I. Birgissonar sérkennilega kveðju. Bæjarráðsmaður í Kópavogi segir ummæli Gunnars fordómafull og afturhaldssöm.</font /></b />

Deilt um stuðningsyfirlýsingu

"Mönnum finnst að Gylfi sé að taka að sér umboð sem hann ekki hefur og það sé ómaklegt," segir Árni Guðmundsson formaður Starfsmannafélags Hafnarfjarðar og félagi í verkalýðsmálaráði Samfylkingarinnar.