Innanlandsflug í lagi

Innanlandsflug hefur gengið nokkuð vel í morgun, þó að á tímabili hafi litið út fyrir að akureyrarflug væri í hættu vegna veðurs. En allar vélar hafa komist í loftið og er von á síðustu vél Flugfélags Íslands aftur til Reykjavíkur um klukkan þrjú í dag.

Tættu utan af pökkunum

Þeim var ekkert heilagt, þjófunum sem brutust inn í íbúðarhús í Garðabæ í gær, því auk þess að láta greipar sópa um verðmæti í húsinu, réðust þeir á jólapakkana undir jólatrénu og tættu utan af þeim. Höfðu þeir sitthvað á brott með sér. Eins og gefur að skilja voru heimilismenn harmi slegnir, en betur fór en á horfðist.

Fjöldi í kuldanum í miðbænum

Hátt í tuttugu þúsund manns voru í miðbæ Reykjavíkur þegar mest var í gærkvöldi, þrátt fyrir talsvert frost, en veður var kyrrt þannig að kuldinn varð ekki bítandi. Lítið bar á ölvun og aðeins tveir ökumenn voru teknir grunaðir um ölvunarakstur í gærkvöldi og í nótt, þrátt fyrir gríðarlega umferð.

Saltfiskurinn kemst til skila

Minnstu mátti muna að þrálát óveður á Íslandsmiðum í oktober og nóvember hefðu áhrif á jólahald í Portúgal, Grikklandi og á Spáni, því fjöldinn allur í þessum löndum hefur saltfisk í jólamatinn og er íslenskur saltfiskur jafnan hæst skrifaður.

Hátt í 3 milljónir jólakorta

Íslandspóstur hefur dreift hátt í þremur milljónum jólakorta undanfarna daga, sem lætur nærri að séu um það bil tíu jólakort á hvert mannsbarn í landinu. Jólakortið virðist því halda velli þrátt fyrir möguleikann á að senda jólakveðju á netinu eða með símaskilaboðum.

Víða ófært vegna veðurs

Stórhríð geysar nú víða á Norður- og Norðausturlandi og er orðið ófært á þessum slóðum. Hátt í tíu manns í nokkrum bílum urðu að hafast við í stórhríð á Siglufjarðarvegi í alla nótt eftir að tvö snjóflóð féllu á veginn með stuttu millibili og ekki var hægt að snúa við vegna ófærðar.

Fer líklega ekki í bráð

Lögmaður Bobbys Fischers er vondaufur um að japönsk stjórnvöld muni leyfa skákmeistaranum að fara úr landi á næstunni. Skákmeistarinn hefur handskrifað bréf til japanskra stjórnvalda með beiðni um að fá að fara til Íslands.

Bandaríkjamenn sækja á Evrópumið

Bandarískir útvegsmenn sækja nú mjög inn í Evrópusambandið með bandarískar sjávarafurðir í beinni samkeppni við íslenskar sjávarafurðir, vegna þess hve Evran er sterk gagnvart dollarnum. Þeir juku útflutning til sambandsins um fjórðung fyrstu níu mánuði ársins og er ekkert lát á sókninni síðan.

Nóg eftir af jólatrjám

Nóg er eftir af jólatrjám hjá helstu jólatrjáasölum í höfuðborginni. Fregnir bárust í gær um að skortur væri á trjám, og að verð hefði í kjölfarið hækkað hjá einhverjum söluaðilum. Stærstu söluaðilarnir í Reykjavík sögðu þó engan skort, þó að lítið eitt minna hefði víða verið keypt inn af trjám en í fyrra.

Mikil fátækt í Mongólíu

Meðan jólin nálgast bíður hundruða heimilislausra barna í höfuðborg Mongólíu harður vetur og svelti. Þriðjungur af íbúum landsins býr við sára fátækt. Fátækt hefur aukist mjög í Mongólíu síðan valdatíma kommúnista lauk og stuðningur frá Rússlandi hætti. Heimilislausum börnum hefur fjölgað mjög, og er talið að um tíu þúsund séu heimilislausir í höfuðborginni.

Messufall vegna ófærðar

Vegna ófærðar og stórhríðar verður víða messufall á norður- og norðausturlandi. Í Hólaneskirkju falla niður messur sem áttu að vera klukkan fjögur og ellefu í kvöld. Á Svalbarðsströnd fellur einnig niður messa í dag, sem og á Raufarhöfn og Grenivík. Þá hefur bænastund í Vestmannaeyjum verið frestað til morguns vegna hvassviðris.

Mikil umferð við kirkjugarða

Þúsundir Íslendinga vitja látinna ástvina í kirkjugörðum landsins í dag. Mikil umferð er við garðana í höfuðborginni og þá sérstaklega Fossvogs- og Gufuneskirkjugarð. Umferðarstofa hefur gert ráðstafanir til að greiða sem mest fyrir umferð þannig að ein leið sé virk að görðunum og önnur leið frá þeim.

Vonskuveður fyrir norðan og austan

Vonskuveður er um norðan- og austanvert landið. Þar er víða ófært og ekkert ferðaveður. Illa hefur gengið að koma pósti til skila. Veðurspáin er ekki girnileg fyrir daginn. Búist er við stormi á norðan- og austanverðu landinu, og þar er víða vonskuveður, hríðarbylur og ekkert ferðaveður.

Lögregla leitar ofbeldismanns

Lögreglan í Keflavík leitar manns sem veitti manni áverka í heimahúsi í Keflavík undir morgun. Sá sem varð fyrir árásinni var fluttur á sjúkrahúsið í Keflavík og mun meðal annars vera nefbrotinn. Vitni voru að átökunum og er vitað hver árásarmaðurinn er en hann hefur áður gerst brotlegur við lög.

Breyttu landinu án blóðsúthellinga

Kosningabaráttan í Úkraínu stendur nú sem hæst - aftur. Frambjóðandi stjórnarandstöðunnar, Viktor Júsjenko, hrósaði stuðningsmönnum sínum á útifundi í gær og sagði þá hafa breytt landinu án blóðsúthellinga.

Vörubíll festist undir þakskyggni

Háum vöruflutningabíl var ekið undir skyggni yfir plani við Veganesti við Hörgárbraut á Akureyri í nótt þannig að flutningakassinn rakst upp undir skyggnið. Þar sat bíllinn klossfastur og tók hálfa aðra klukkustund, með aðstoð tveggja stórra krana, að losa hann undan skyggninu sem er stórskemmt.

Ætluðu að myrða krónprinsinn

Sádi-Arabar hafa kallað sendiherra sinn í Líbíu heim þar sem þeir þykjast hafa heimildir fyrir því að Líbíumenn hafi lagt á ráðin um að ráða Abdullah, krónprins Sádi-Arabíu, af dögum. Krónprinsinn er sá sem í raun og veru hefur völdin í landinu.

Hlupu þjófana uppi

Lögreglumenn á Akureyri hlupu í nótt uppi tvo menn, grunaða um að hafa brotist inn í verslunarmiðstöðina við Sunnuhlíð. Tilkynnt var um innbrot þar og sáust mennirnir í grennd. Þegar lögregla ætlaði að hafa tal af þeim tóku þeir til fótanna en höfðu ekkert að gera í sprettharða lögreglumennina sem handtóku þá.

Annan vill ekki fara til Darfur

Tilraunir Sameinuðu þjóðanna til að stilla til friðar í Darfur-héraði í Súdan hafa ekki skilað neinum árangri, segir Kofi Annan, framkvæmdastjóri samtakanna. Hann telur rétt að hugsa upp á nýtt hvernig taka beri á málum. Annan neitar að fara til Darfur.

Stálu ísskáp úr íbúð á 3. hæð

Bíræfnir þjófar stálu stórum tvöföldum ísskáp með ísmolavél úr íbúð á þriðju hæð í fjölbýlishúsi í Breiðholti í gærdag. Þeir slitu ísskápinn úr sambandi, og þar með vatnslögnina til ísmolavélarinnar, með þeim afleiðingum að vatn fór að leka úr leiðslunni. Þegar flætt hafði um alla íbúðina tók vatnið að leka niður í tvær íbúðir fyrir neðan.

Dularfull viðskipti með Yukos

Það vakti furðu fyrr í vikunni þegar dularfullt, áður óþekkt fyrirtæki, með höfuðstöðvar sínar í farsímaverslun úti í sveit, keypti stærstu eignir rússneska olíufyrirtækisins Yukos á uppboði. Atburðir næturinnar eru ekki síður dularfullir en þó ekki óviðbúnir. Rússneska ríkisolíufyrirtækið Rosneft hefur keypt Baikal Finance Group, fyrirtækið sem keypti eignir Yukos.

Skíðasvæðið í Tungudal opið

Skíðasvæðið í Tungudal verður opið frá 11-15 í dag og göngusvæðið í Seljalandsdal opnar klukkan 13. Stillt veður á svæðinu en mikið frost, -15 gráður. Skíðasvæðin í Bláfjöllum og í Skálafelli eru hins vegar lokuð fram yfir jól í það minnsta.

Kosningar í Palestínu í dag

Fyrstu borgar- og sveitarstjórnarkosningar í þrjá áratugi á sjálfsstjórnarsvæðum Palestínumanna fara fram í dag en litið er á þær sem einskonar æfingu fyrir forsetakosningar í landinu í janúar. Mikill fjöldi kjósenda virðist hafa tekið þátt í kosningunni sem ætti einnig að gefa nokkra mynd af fylgi megin stjórnmálahreyfinga á sjálfsstjórnarsvæðunum.

Fuglaflensa víða í Víetnam

Fuglaflensa hefur fundist í sex umdæmum í Víetnam undanfarnar þrjár vikur og hefur yfir tíuþúsund fuglum verið fargað til að koma í veg fyrir faraldur. Í Kína búa stjórnvöld sig jafnframt undir fuglaflensu í vetur og í því augnamiði að hefta útbreiðslu er nú unnið að því að þjálfa heilbrigðisstarfsfólk í að greina flensuna og meðhöndla.

Leikskólakennarar skrifuðu undir

Samningamenn leikskólakennara og sveitarfélaga undirrituðu nýjan kjarasamning í gærkvöldi hjá Ríkissáttasemjara en leikskólakennarar voru búnir að vera með lausa samninga síðan í sumar. Samningurinn gildir til 30. september árið 2006 eða nokkuð skemur en samningar sem gerðir hafa verið að undanförnu.

Hnífstunguárásir í Lundúnum

Einn maður er látinn og í það minnsta fimm eru alvarlega slasaðir eftir að maður eða menn réðust á fólk í Norður-Lundúnum í morgun og stungu það. Einn maður hefur verið handtekinn og svo virðist sem hann hafi ráðist á fólkið handahófskennt í æðiskasti. Hvorki hefur þó verið útilokað að fleiri eigi hlut að máli né að árásirnar hafi verið fleiri.

Læknar skrifuðu undir í gær

Samninganefnd heilbrigðis- og tryggingamálaráðherra og fulltrúar Læknafélags Reykjavíkur undirrituðu í gær samninga um lækningar utan sjúkrahúsa fyrir sjúkratryggða. Samningurinn er til tæplega fjögurra ára og tekur til allra sérfræðilækna annarra en bæklunarlækna.

Sjúkragögnum drengs stolið

Mikilvæg sjúkragögn um ungan dreng, sem er á förum til Bandaríkjanna til að gangast undir læknismeðferð, eru meðal þess sem er í svartri leðurtösku sem stolið var af konu í Bónus í Hafnarfirði í gær. Rannsóknalögreglan í Hafnarfirði skorar á þjófinn að skila gögnunum sem eru drengnum afar mikilvæg.

Yfirheyrður vegna málverkaránsins

Norska lögreglan hefur yfirheyrt mann sem grunaður er um aðild að ráninu á málverkum Munchs, <em>Ópinu</em> og <em>Madonnu</em>, af safni í Ósló í sumar. Fram að þessu hafði lögreglu ekkert orðið ágengt við rannsóknina og hafði enga hugmynd um hver kynni að hafa verið að verki. Maðurinn neitar sök og var sleppt að loknum yfirheyrslum.

Fegin að málinu sé lokið

Guðmundur Guðlaugsson, bæjarstjóri á Patreksfirði, segir að fórnarlömb mannsins sem fékk fjögurra ára fangelsisdóm í Héraðsdómi Vestfjarða í gær hafi öll fengið aðstoð vegna áfallsins. Yfirheyrslur og rannsókn málsins hafi reynt mikið á og hann sé feginn að málinu sé lokið. Nanna Sjöfn Pétursdóttir, skólastjóri grunnskólans þar, tekur í sama streng.

Olíuauðlindir landsins þjóðnýttar

Pútín Rússlandsforseti telur sanngjarnt að þjóðnýta olíuauðlindir landsins. Þannig megi verja hagsmuni ríkisins gegn áhrifum ósanngjarnrar og ólöglegrar einkavæðingar undanfarinn áratug. Þetta sagði hann nú þegar ríkið hefur náð tökum á helstu eignum olíufyrirtækisins Yukos.

Búist við miklum kulda í kvöld

Ástæða er til að vara fólk við því að víða í þéttbýli á láglendi má búast við tíu stiga frosti í kvöld og vindhraða upp á fimmtán metra á sekúndu. Við þær aðstæður svarar kuldinn til allt að þrjátíu stiga frosti í logni, segir Kristín Hermannsdóttir veðurfræðingur.

Friðargöngur víða um land

Gengið er til friðar víða um land í dag eins og venja er á Þorláksmessu. Samstarfshópur friðarhreyfinga efnir til blysfarar niður Laugaveginn sem hefst á Hlemmi klukkan sex. Gengið verður niður á Ingólfstorg þar sem flutt verða ávörp og Hamrahlíðarkórinn syngur.

Óþefurinn úr eldhúsinu er svo ...

Skötuilm, eða -óþef, leggur nú úr eldhúsum og frá veitingastöðum samkvæmt vestfirskum sið. Helgi Hafliðason, fyrrverandi fisksali í Fiskbúð Hafliða, á ættir að rekja til Vestfjarða. Hann vill hafa skötuna vel kæsta. Að sögn Sigurðar eru sögusagnir um að Vestfirðingar migi á skötuna, og grafi hana síðan til að hafa hana vel kæsta, tóma þvælu.

Velflestir misstu velflest

Á annan í jólum í fyrra reið jarðskjálfti yfir Bam í Íran með þeim afleiðingum að 27.000 manns létu lífið. Ári síðar reyna eftirlifendurnir að færa samfélagið í samt horf eins og frekast er kostur

Kostnaðarhækkun upp á milljarð

Kostnaðarhækkun sveitarfélaganna í landinu vegna kjarasamnings við leikskólakennara nemur rétt rúmum milljarði króna í heildina.

24 féllu í Nepal

Að minnsta kosti tuttugu og fjórir eru sagðir hafa fallið í bardögum nepalska hersins og skæruliða úr röðum maóista í Nepal í dag. 22 hinna látnu voru skæruliðar. Yfir hundrað manns hafa þar með látist í átökum deiluaðilanna síðastliðna viku.

Þagnarskyldan mismunandi

Þagnarskylda lögreglumanna er mismunandi eftir málefnum og aðstæðu hverju sinni og metin í samræmi við það.

Danir blekktu ekki Grænlendinga

Danski forsætisráðherrann, Anders Fogh Rassmussen, vísar því á bug að danska ríkisstjórnin hafi afvegaleitt Grænlendinga þegar Grænland var innlimað í Danmörku fyrir hálfri öld.

14 létust og 33 særðust í Írak

Fjórtán létust og þrjátíu og þrír særðust þegar tvær sprengjur sprungu í tveimur árásum suður af Bagdad í gærkvöld. Níu létust og þrettán særðust í sjálfsmorðsárás þegar bifreið hlaðin sprengiefnum ók inn í vegatálma. Þeir sem létust voru úr þjóðvarðliðinu og lögreglunni, auk nokkurra óbreyttra borgara.

Ánægð með kjarasamningi leikskóla

Enn vantar upp á að jafna laun leikskólakennara að kjörum grunnskólakennara, segir Björg Bjarnadóttir, formaður Félags leikskólakennara. Á það verði stefnt með næstu samningum árið 2006.

Qureia gagnrýnir fyrirhugaðan fund

Ahmed Qureia, forsætisráðherra Palestínu, gagnrýndi í dag harðlega fyrirhugaðan fund í Lundúnum um umbætur í Palestínu. Hann sagði að það sem þyrfti til væri friðarráðstefna. Hann er ekki í aðstöðu til að ákveða hvort Palestínumenn sæki fundinn en afstaða hans er engu að síður merki um ágreining meðal leiðtoga Palestínumanna eftir dauða Jassirs Arafats.

Í skóinn fyrir 200 milljónir

Fjármálaráðuneytið áætlar að sextíu og fimm þúsund börn yngri en fjórtán ára fái í skóinn fyrir þessi jól. Verðmæti gjafanna sé að meðaltali um 250 krónur og alls þurfi jólasveinarnir því að kaupa gjafir fyrir hátt í 200 milljónir. Ráðuneytið hefur fyrir satt í þessari hávísindalegu könnun að Kertasníkir sé gjafmildastur bræðranna.

Nefndin hættir skrifstofurekstri

Kjararannsóknarnefnd og Hagstofa Íslands hafa gert með sér samstarfssamning um launakannanir og aðrar vinnumarkaðsrannsóknir. Frá og með 1. janúar 2005 verður launakönnun Kjararannsóknarnefndar framkvæmd af Hagstofunni og hættir nefndin skrifstofurekstri frá þeim tíma.

Landspítalinn tekur við rekstrinum

Landspítalinn hefur tekið við rekstri sjúkrahótels af Rauða krossinum sem hefur staðið fyrir rekstri þess í þrjá áratugi, nú síðast í samvinnu við Landspítalann og Fosshótel. Landspítalinn hefur samið við Fosshótel til næstu fimm ára um áframhaldandi samstarf um rekstur sjúkrahótels.