Fuglaflensuveiran finnst í svínum

Vísindamenn í Kína telja sig hafa fundið hina skæðu fuglaflensuveiru í svínum þar í landi, og segjast þeir hafa fundið hana á nokkrum bóndabæjum í Kína. Yfir 20 manns létust og um 200 milljónir fuglar voru drepnir, þegar fuglaflensufaraldur gekk yfir Asíu fyrr á þessu ári.

Lögreglukór og vatnadansmeyjar

Lögreglukórinn mun syngja kl. 18 á menningarnótt bæði fyrir utan og utan á lögreglustöðinni við Hlemm. Vatnadansmeyjafélagið Hrafnhildur mun jafnframt sýna listir sínar og yndisþokka. En Lögreglukórinn og Vatnadansmeyjafélagið Hrafnhildur, hafa einu sinn áður leitt saman hesta sína. Vinnupallar eru á lögreglustöðinni vegna viðhalds og verða þeir nýttir sem sviðsmynd.

Starfslið SÞ ætti að fara

Starfsmannasamtök Sameinuðu þjóðanna telja að allt starfslið Sameinuðu þjóðanna í Afganistan eigi að yfirgefa landið þar sem þeim sé hætta búin. Líklegt þykir að starfsmenn Sameinuðu þjóðanna verði skotmörk þegar líður að kosningum í landinu í október. Þá verður kosinn nýr forseti, en ný stjórn verður kosin í apríl á næsta ári.

Reyndu að komast til Spánar

Sextíuogfjórir Marokkóbúa voru handteknir þegar þeir reyndu að smygla sér ólöglega á litlum gúmmíhraðbáð til Spánar. Hraðbáturinn var stöðvaður við strendur Marokkó í gær og voru allir um borð handteknir vegna gruns um að vilja flýja til Evrópusambandsins.

Átök blossa upp á ný

Átök blossuðu upp milli bandarískra hersveita og herskárra sjítamúslima í Najaf í dag, en nokkuð friðsælt var fram eftir degi í þessari heilögu borg múslima. Mannlaust flugfar brotlenti í borginni og segja stuðningmenn sjítaklerksins al-Sadr að þeir hafi skotið farið niður.

Lýsa stuðningi við ráðherraval

Stjórnir allra Framsóknarfélaga í Reykjavíkurkjördæmi norður lýsa í ályktun stuðningi við þá niðurstöðu sem varð í ráðherravali Framsóknarflokksins. Í ályktun félaganna segir að formaður og þingflokkur Framsóknarflokksins hafi tekið erfiða en óhjákvæmilega ákvörðun, að skipa ráðherra í væntanlega ríkisstjórn undir forsæti Halldórs Ásgrímssonar.

Flugsýning í Búdapest

Óvenju hugaðir flugmenn, hvaðanæva úr veröldinni, sýndu snilli sína á flugsýningu í Búdapest, höfuðborg Ungverjalands. Þeir gerðu sér lítið fyrir og flugu meðal annars undir brúna yfir Dóná, sem er í nágrenni ráðhússins í borginni.

Mótorhjól til styrktar börnum

Harley Davidson klúbburinn á Íslandi greip til nýstárlegrar fjáröflunar í dag í tengslum við menningarnótt í Reykjavík. Félagar í klúbbnum, sem eðli málsins samkvæmt eiga Harley Davidson mótórhjól, buðu hverjum sem prófa vildi að fara í stuttan ökutúr sem farþegi á Harley Davidson.

Öryggismál komin í lag

Vinna við stærsta steypumannvirki Íslandssögunnar, undirstöður Kárahnjúkastíflu, er komin á fullt á ný. Trúnaðarmaður starfsmanna segir öryggismál á svæðinu komin í lag, eftir banaslysið sem varð í mars.

Segja verðkannanir illa unnar

Verðkannanir á skólavörum eru illa unnar og þar með marklausar. Þetta fullyrða eigendur bóka- og ritfangaverslana, sem telja sumar verslanir beita blekkingum til að koma sem best út í verðkönnunum.

Listamannaþing á Eiðum

Listamannaþingi lauk á Eiðum í dag. Tugur innlendra og erlendra listamanna sótti þingið. Sigurjón Sighvatsson, einn eigenda Eiða, segir starfsemina þar hafa verið mjög jákvæða. Á þriðja tug gesta sóttu Listamannaþing Eiða sem staðið hefur í fjóra daga

Sprengjur í strandbæjum á Spáni

Fjórir særðust þegar tvær sprengjur sprungu í tveimur strandbæjum á Norður-Spáni í morgun. Maður, sem kenndi sig við ETA, aðskilnaðarsamtök Baska, gerði lögreglu viðvart um sprengjurnar, sem sprungu í Baiona og Sanxenxo. Lögregla rýmdi hafnarsvæðið í Baiona áður en sprengjan sprakk.

Enn fjölgar dópmálum á ÓL

Enn fjölgar þeim íþróttamönnum sem þurfa frá að hverfa vegna ólöglegrar lyfjanotkunar á Ólympíuleikunum í Aþenu. Kúluvarpara frá Úsbekistan og lyftingamanni frá Indlandi hefur verið vísað frá leikunum.

Morðingi laus í London

Tuttugu og tveggja ára frönsk kona var myrt í Twickenham-hverfi, í suðvesturhluta Lundúnaborgar í fyrrinótt. Þetta er fimmta árásin af þessu tagi, sem gerð hefur verið í hverfinu, á skömmum tíma. Óttast er að einn og sami maðurinn hafi verið að verki í öll skiptin.

Ætla að grípa til aðgerða

Framsóknarkonur eru staðráðnar í að grípa til aðgerða vegna óánægju með þingflokk Framsóknarflokksins. Þær felast meðal annars í því að seilast til aukinna áhrifa í flokknum. Talsmaður þeirra segir yfirlýsingu formanns flokksins um breytingar á ríkisstjórninni eftir tvö ár innihaldslitla og vera eins og stormur í vatnsglasi.

Ali enn í haldi liðsmanna Sadr

Liðsmenn uppreisnarklerksins Múktada al-Sadr hafa Ali-moskuna, í borginni Najaf í Írak, enn á sínu valdi. Viðræður um að afhenda hana æðsta trúarleiðtoga sjíta, al-Sistani, hafa staðið yfir í dag en til átaka kom í nágrenni við moskuna.

Olíuverð áhrif á sjávarútveg

Hækkandi heimsmarkaðsverð á olíu getur aukið kostnað íslenskra sjávarútvegsfyrirtækja um allt að þrjá milljarða króna á þessu ári að sögn Friðriks Arngrímssonar, framkvæmdastjóra LÍÚ. Hann segir rekstrargrundvöll margra útgerðarmanna í hættu.

3.821 í Reykjavíkurmaraþoni

3.821 maður tók þátt í Reykjavíkurmaraþoni, sem fram fór í blíðskaparveðri í dag, fleiri en nokkru sinni fyrr. Reykjavíkurmaraþon markar upphaf Menningarnætur í Reykjavík. Hlauparar í heilu maraþoni lögðu reyndar af stað klukkan tíu, en rétt fyrir ellefu gátu aðrir hitað upp í takt.

Björk óvæntur gestur

Mikill mannfjöldi er nú í miðbæ Reykjavíkur þar sem fram fer menningarnótt í níunda sinn. Lögreglan áætlar að allt að 100 þúsund manns verði í bænum í kvöld, líklega fleiri en áður hafa komið saman hérlendis.

Góður andi á Menningarnótt

;Ég er búin að þvælast út um allan bæ og hef farið á þá staði þar sem fjöldinn hefur verið þéttastur og ég er hreinlega að rifna úr hamingju. Andinn í bænum er rosalega fínn," sagði Sif Gunnarsdóttir, framkvæmdastjóri Menningarnætur, þegar Fréttablaðið ræddi við hana í gærkvöld.

Nýr taki við Imam Ali moskunni

Harðar árásir, sem gerðar voru í nótt á borgina Najaf í Írak, virðast hafa hrist upp í harðlínuklerknum Múktada al-Sadr. Fulltrúar hans vilja nú að erindrekar æðsta klerks Íraks,  al-Sistani, taki við stjórn Imam Ali moskunnar í Najaf, þar sem al-Sadr hefur haldið til.

Fartölvustuldur færist í vöxt

Þjófnaður á fartölvum færist í vöxt í upphafi skólaárs og beinir lögregla þeim tilmælum til fólks að skilja fartölvur sínar ekki eftir í mannlausum bílum. Í morgun var tveim fartölvum stolið í Reykjavík. .

Fimm látast í Fallujah

Fimm hið minnsta fórust í sprengjuárásum á borgina Fallujah í Írak í nótt, en þar hefur andspyrna verið mikil frá upphafi. Árásirnar hófust á ný í morgun. Raunar hafa bandarískar orrustuvélar varpað sprengjum á borgina nánast daglega undanfarna viku. Fallujah er ein meginbækisstöð andspyrnu og skæruliða í Írak, en það eru einkum Súnnítar sem þar búa.

Læknar aðstoða við pyntingar

Prófessor við Háskólann í Minnesota í Bandaríkjunum segir lækna hafa aðstoðað fangaverði við pyntingar á föngum í Abu Graib fangelsinu. Hann segir ákveðna lækna hafa falsað dánarúrskurði, til þess að hylma yfir morð og pyntingar á föngum.

Vinna skítverk fyrir Bush

John Kerry, forsetaefni Demókrata, segir þann hóp manna sem heldur uppi áróðri um að hann hafi ekki særst í Vietnamstríðinu vera að vinna skítverk fyrir Bush forseta. Hann segir áróðursherferðina kostaða af repúblikana frá Texas

Mannlaus vörubíll rann tugi metra

Tæplega níu tonna mannlaus vörubíll með tengivagni rann tugi metra fyrir ofan Smárlind í gærkvöldi, en stöðvaðist þar sem tengivagninn snerist og ölli því ekki tjóni. Bílstjóri vörubílsins yfirgaf bílinn rétt fyrir miðnætti í gærkvöldi og gleymdi að setja stöðuhemla á hann, með þeim afleiðingum að bíllinn rann af stað, að sögn lögreglunnar í Kópavogi.

Reykur í farþegarými

168 farþegar spænskrar leiguflugvélar urðu að flýja út um neyðarútganga eftir að mikill reykur myndaðist í farþegarými vélarinnar í morgun. Vélin var á brautarenda á flugvellinum í Köln í Þýskalandi og var við það að taka á loft þegar reykurinn fyllti farþegarýmið.

Fellibylur og flóð í Japan

Fellibylurinn Megi skall með offorsi á norðurströnd Japans í morgun. Stormurinn olli uppnámi í samgöngum, rafmagnsleysi og flóðum. Megi hefur undanfarna þrjá daga valdið miklu uppnámi í Suður-Kóreu og hluta Japans, en alls er talið að þrettán hafi farist í ofsaveðrinu.

77 létust á sólarhring

77 manns hið minnsta hafa farist í hörðum árásum á skotmörk í Najaf í Írak undanfarinn sólarhring. Harðlínuklerkurinn Múktada al-Sadr er þar í skotlínu írakskra og bandarískra sveita.

Olíuverð hækkar um 59% á ári

Olíuverð stefnir yfir fimmtíu dollara í dag. Í gærmorgun var verðið á olíufati um 47 dollarar. Um hádegisbil var það orðið 47 dollarar og 50 sent, og þegar viðskiptum var hætt á markaði í gær var verðið á olíufati komið upp í 48 dollara og 98 sent.

Tölvukerfi maraþons hrundi

Aðstandendur Reykjavíkurmaraþons urðu fyrir því óláni í morgun að tölvukerfi, sem heldur utan um skráningu keppenda, hrundi. Af þeim sökum verður ekki unnt að byrja að afhenda keppendum gögn nú á hádegi, eins og til stóð, og frestast það til klukkan tvö.

Harward og Princeton bestir

Harward og Princeton eru bestu háskólar Bandaríkjanna fyrir grunnnám, samkvæmt nýrri rannsókn fréttatímaritsins US News and World Report. Yale og háskólinn í Pennsilvaníu fylgja fast á hæla þeim.

Munu fara í skaðabótamál

Erfingjar Halldórs Laxness, hafa í engu breytt þeirri ákvörðun sinni að fara í skaðabótamál við Hannes Hólmstein Gissurarson. Héraðsdómur Reykjavíkur bannaði í gær siðanefnd Háskóla Íslands að fjalla um kæru erfingja Halldórs Laxness, á hendur Hannesi Hólmsteini Gissurarsyni

Clinton hittir íslenska ráðamenn

Bill Clinton mun hitta íslenska ráðamenn á þriðjudaginn kemur, þegar hann verður hér á landi ásamt eiginkonu sinni og sendinefnd Bandaríkjaþings. Leynd hefur ríkt yfir því hvað Clinton-hjónin hyggðust gera hér á landi á þriðjudaginn, en eins og Stöð 2 og Bylgjan hafa greint frá verða þau hér í tengslum við heimsókn sendinefndar öldungadeildar Bandaríkjaþings.

Slæmt fyrir jafnréttirbaráttuna

Þingflokksformaður Samfylkingarinnar segir Framsóknarflokkinn hafa tekið skref aftur á bak í jafnréttisbaráttu kynjanna og það eigi eftir að kosta flokkinn fylgi í næstu kosningum. Brotthvarf Sivjar Friðleifsdóttur úr ráðherrastóli veiki ríkisstjórnina og hugmyndir um frekari breytingar á ráðherraliði flokksins haldi óvissu innan Framsóknarflokksins gangandi.

Hættir þátttöku í þjóðfélagsumræðu

Jón Steinar Gunnlaugsson, hæstaréttarlögmaður, segir að ef hann fái embætti hæstaréttardómara, muni hann hætta allri þátttöku í þjóðfélagsumræðunni. Hann hefur um árabil tekið virkan þátt í þjóðmálaumræðunni, og verið þar með hvassari pennum. Hann hefur einnig verið eftirsóttur álitsgjafi hjá öllum fjölmiðlum landsins.

Óeðlilegir viðskiptahættir

Framkvæmdastjóri Skólavörubúðarinnar segir óeðlilega viðskiptahætti stundaða í verslun skólavöru. Ákveðnir aðilar selji vörur sem teknar eru fyrir í verðkönnunum á mjög lágu verði til þess að ná sér í fyrirsagnir.

Arðsemi menntunar á Íslandi

Háskólamenntun kvenna er sú menntun sem skilar mestri arðsemi samkvæmt nýrri skýrslu frá Hagfræðistofnun Háskóla Íslands. Í skýrslunni, sem unnin var af Jóni Bjarka Bentssyni og Þórhalli Ásbjörnssyni kemur fram að háskólanám skilar konum tæplega 11% einkaarðsemi, en körlum aðeins rúmum fimm prósentum.

Enn átök við Imam Ali moskuna

Átök halda áfram við Imam Ali moskuna í Najaf, þrátt fyrir yfirlýsingu stjórnvalda í Írak að lögregla hafi moskuna í haldi. Þá neita einnig talsmenn sjíta klerksins al-Sadr að lögreglan sé inní moskunni.

Hlægilegt að halda úti herstöð

Einum virtasta dálkahöfundi Bandaríkjanna finnst það nánast hlægilegt að halda úti herstöð á Íslandi. Charles Krauthammer skrifar fyrir blöð eins og Washington Post og Time. Í Washington Post, í dag, fjallar hann um þá ákvörðun Georges Bush að flytja tugþúsundir bandarískra hermanna frá herstöðvum sem þeir manna nú.

Virkjunin rannsökuð og metin

Stærsta virkjanaverkefni Íslands til þessa , Kárahnjúkavirkjun, verður rannsakað og metið af vísindamönnum. Þetta kom fram á kynningu sem haldin var á Egilsstöðum í tengslum við fund norrænu félagsmálaráðherranna.

Endurnýjanleg orka í brennidepli

Umhverfisráðherrar Norðurlanda verða með endurnýjanlega orku í brennidepli, nýjar orkulindir og baráttuna gegn loftslagsbreytingum, þegar þeir hittasta í Reykjavík í næstu viku.

Mikið um að vera

Magnús Geir Þórðarson, leikhússtjóri Leikfélags Akureyrar, býður leikhúsgestum upp á hlaðborð full af kræsingum í vetur. Leikfélagið sjálft verður með fjórar frumsýningar, og auk þess verða fjórar gestaleiksýningar, þar af ein frá Hollandi.

Trúa á tengsl Saddams og al-Kaída

Rúmur þriðjungur Bandaríkjamanna telur að Írakar hafi verið í nánum tengslum við al-Kaída fyrir innrás Bandaríkjahers og bandamanna þeirra samkvæmt nýrri könnun. Þar kemur einnig fram að fimmtán prósent þeirra telja að Íraksstjórn hafi átt beina aðild að hryðjuverkaárásunum í New York og Washington 11. september 2001.

Ruglað saman við hryðjuverkamann

Edward Kennedy er einn frægasti stjórnmálamaður Bandaríkjanna en það dugar ekki til að koma í veg fyrir að honum sé ruglað saman við hryðjuverkamann og lendi þar af leiðandi í vandræðum með að ferðast með flugi innan Bandaríkjanna.