Frá þessu greina enskir fjölmiðlar nú í morgunsárið. Þar kemur fram að Southgate hafi sent sóknarmönnunum viðvörun ætli þeir sér að vera í hópi hans sem fer á HM. Hvorugur er nú með liðinu sem hefur ekki unnið í þeim þremur leikjum sem það hefur spilað í júní. Þá hefur liðið aðeins skorað eitt mark í leikjunum þremur.

Bæði Rashford og Sancho áttu mjög erfitt uppdráttar síðasta vetur líkt og nær allir leikmenn Man United. Hinn 22 ára gamli Sancho var þarna að spila sitt fyrsta tímabil í ensku úrvalsdeildinn og náði engan veginn sömu hæðum og hann hafði gert með Borussia Dortmund í Þýskalandi á undanförnum árum.

Alls kom Sancho að átta mörkum í þeim 38 leikjum sem hann lék fyrir Man United í vetur. Í þeim 23 A-landsleikjum sem Sancho hefur tekið þátt í hefur hann komið að 10 mörkum.

Hinn 24 ára gamli Rashford virtist svo brotinn á bæði líkama og sál eftir að hafa spilað í gegnum erfið meiðsli á undanförnum tveimur tímabilum. Hann fór í aðgerð eftir að EM lauk og missti því af öllu undirbúningstímabili Man United. 

Rashford kom að sjö mörkum í þeim 32 leikjum sem hann lék fyrir Man Utd í vetur. Hann hefur tekið þátt í 46 A-landsleikjum og komið að 17 mörkum.

Bæði Rashford og Sancho voru meðal þeirra þriggja landsliðsmanna sem klikkuðu á vítaspyrnu er England beið lægri hlut gegn Ítalíu í úrslitaleik EM síðasta sumar. Báðir komu inn af bekknum er nokkrar sekúndur voru eftir af framlengingu leiksins.

Eftir leik urðu þeir fyrir miklu aðkasti og kynþáttahatri. Southgate hefur nefnt að eftirmálar leiksins gætu haft áhrif hver tekur vítaspyrnur fyrir enska liðið ef það kemst í vítaspyrnukeppni á komandi árum. 

Hvort þjálfarinn ætli sér að gefa leikmönnum meira en aðeins nokkrar sekúndur til að komast í takt við leikinn áður en farið verður í vítaspyrnukeppni er hins vegar alls óvíst.