Ný bílastæði stytta göngu á útsýnisstaði á eldgosið

Kristján Már Unnarsson skrifar 20. ágúst 2021 22:22

Nýja bílastæðið á túninu í Stóra-Leirdal er við leið C. Uppgönguleiðin á Langahrygg sést fyrir aftan. Egill Aðalsteinsson

Þeir sem vilja ganga að eldstöðinni í Fagradalsfjalli hafa núna möguleika á að stytta gönguna með því að nýta sér ný bílastæði sem tekin hafa verið í notkun. Þá er í bígerð að lagfæra vinsælustu gönguleiðina upp á Langahrygg til að draga úr slysahættu.

Í fréttum Stöðvar 2 mátti sjá nýju bílastæðin, þar á meðal fyrsta stæðið sem lagt var vegna gossins. Það er við upphaf gönguleiða vestan Borgarfjalls en það stæði var lengst af eingöngu ætlað viðbragðsaðilum. Það hefur núna verið opnað almenningi en með því að leggja þar styttast gönguleiðir þær sem nefndar eru A og B, miðað við ef gangan hæfist frá bílastæðum fjær á túnum undir Festarfjalli.

Bílastæðið við upphaf gönguleiða A og B var áður eingöngu fyrir viðbragðsaðila. Það hefur núna verið stækkað og opnað almenningi. Fjær má sjá túnin undir Festarfjalli, sem lengst af þjónuðu sem aðalbílastæði gosferðalanga.Egill Aðalsteinsson

Þeir sem hyggjast fara gönguleið C hafa núna einnig möguleika á að stytta leiðina með því að nýta sér nýtt bílastæði sem er nánast falið í gróinni dalkvos á bak við fjallið Slögu. Til að komast þangað er ekið af Suðurstrandarvegi austan Ísólfsskála um skarð í átt að gamalli jarðvegsnámu undir Bratthálsi en þaðan liggur vegurinn áfram inn í Stóra-Leirdal.

Þar birtast gróin tún sem núna er búið að opna sem bílastæði. Þar geta menn lagt við rætur Langahryggjar, sem hefur verið vinsælasta gönguleiðin eftir að hraun rann yfir gönguleið A, en á Langahrygg eru uppi áform um stígagerð.

Leiðin á bílastæðið í Stóra-Leirdal liggur frá Suðurstrandarvegi um malarslóða sem sjá má vinstra megin.Egill Aðalsteinsson

Það er auðvitað smekksatriði og breytilegt hvaða leið telst best. Þó má segja að stysta gönguleiðin til að komast í gott sjónfæri við eldgíginn liggi núna frá nýja bílastæðinu í Stóra-Leirdal.

„Eins og staðan er í dag, þá er það stysta leiðin,“ segir Hjálmar Hallgrímsson, vettvangsstjóri lögreglu á gossvæðinu, en kort af gönguleiðunum má nálgast á vefnum safetravel.is.

Flest óhöpp verða núna á leiðinni upp á Langahrygg. Þar er búið að koma fyrir kaðli en áformað að bæta leiðina með því að sneiða göngustíg um brekkuna.Egill Aðalsteinsson

„Hugmyndin er svo að laga einnig A-leiðina og með leiðigörðunum. Og það er rétt hjá þér að það á að laga upphafið á Langahrygg.

Þar er móberg og sandur á og við höfum fengið flest óhöppin þar. Þannig að það er á teikniborðinu að gera góðan göngustíg þannig að það fækki slysum.“

Horft eftir Langahrygg sem núna er vinsælasta gönguleiðin.Egill Aðalsteinsson

Teljarar sýna að milli tvö og þrjúþúsund ferðamenn heimsækja gosstöðvarnar á degi hverjum. Allir vilja helst sjá logandi gíginn.

En kannski liggur fljótlegasta leiðin ekki upp á Langahrygg heldur meðfram austurjaðri hans. Frá nýja bílastæðinu í Stóra-Leirdal tekur um það bil fimmtíu mínútur að fara þá leið á venjulegum gönguhraða til að komast á góða útsýnisstaði í skarðinu milli Langahryggjar og fjallsins Stóra-Hrúts.

Hér má sjá frétt Stöðvar 2:

Eldgos í Fagradalsfjalli Eldgos og jarðhræringar Ferðamennska á Íslandi Grindavík

Tengdar fréttir

Allt gengið vel þrátt fyrir fimm mánaða eldgos í bakgarðinum

Eftir fimm mánaða eldgos í útjaðri Grindavíkur segir formaður bæjarráðs það standa upp úr hvað allt hafi gengið vel, þrátt fyrir miklar hættur og gríðarlegt álag. Jarðvísindamaður segir það einkenna gosið hvað það sé stöðugt og máttlítið.

19. ágúst 2021 22:42

Þetta er núna vinsælasti útsýnisstaðurinn á gosið

Drónamyndir sem náðust af gosstöðvunum á Fagradalsfjalli um helgina sýna að hraunelfa flæddi úr eldgígnum um göng og þaðan í átt til Meradala. Slæmt skyggni hefur í dag byrgt sýn að eldgosinu en óróamælar sýna að það hefur haldið fullum dampi.

12. júlí 2021 22:56

Kostar 1.000 krónur frá og með deginum í dag að leggja við gosstöðvarnar

Von er á tilkynningu frá Landeigendafélagi Hrauns sf. í dag, þar sem tilkynnt verður um gjaldtöku á bílastæðunum við gosstöðvarnar í Fagradalsfjalli. Nú þegar er hægt að greiða fyrir að leggja bílnum í Parka-smáforritinu.

19. maí 2021 06:27

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.