Innlent

Allt gengið vel þrátt fyrir fimm mánaða eldgos í bakgarðinum

Kristján Már Unnarsson skrifar
Hjálmar Hallgrímsson er vettvangsstjóri lögreglu á gossvæðinu og formaður bæjarráðs Grindavíkur.
Hjálmar Hallgrímsson er vettvangsstjóri lögreglu á gossvæðinu og formaður bæjarráðs Grindavíkur. Egill Aðalsteinsson

Eftir fimm mánaða eldgos í útjaðri Grindavíkur segir formaður bæjarráðs það standa upp úr hvað allt hafi gengið vel, þrátt fyrir miklar hættur og gríðarlegt álag. Jarðvísindamaður segir það einkenna gosið hvað það sé stöðugt og máttlítið.

Á fimm mánaða afmæli eldgossins í Fagradalsfjalli lá gosvirkni niðri fram eftir degi, eins og sjá mátti á myndum í fréttum Stöðvar 2. Það breyttist síðdegis þegar aftur fór að krauma í gígnum. Óróarit Veðurstofu sýndi upptaktinn.

Óróaritið sýnir vel reglubundið mynstur eldgossins að undanförnu, hvenær það liggur niðri og hvenær virknin er mest í gígnum.Veðurstofa Íslands

Ekkert lát virðist á ferðamannastraumnum þá daga sem lítið sést til gossins. Aðstæður teljast lífshættulegar en verstu meiðslin hafa verið beinbrot.

„Mér finnst kannski standa upp úr hvað þetta hefur allt gengið vel,“ segir Hjálmar Hallgrímsson, vettvangsstjóri lögreglu.

„Það er búið að vera gríðarlegt álag á björgunarsveitum, lögreglu. Það er búið að vera álag á landeigendum, vegagerð og fleiru. En einhvern veginn lendum við á löppunum. Og einhver slys og annað. En þetta er búið að ganga bara mjög vel.“

Horft yfir Langahrygg í átt að eldgígnum í dag. Sjá má ferðamenn á hryggnum. Dalverpið Nátthagi fyrir neðan til vinstri.Egill Aðalsteinsson

Páll Einarsson jarðeðlisfræðingur segir gosið hafa verið mikinn reynslutíma.

„Það er sem sé þetta lærdómsgildi, bæði fyrir jarðvísindin og fyrir þjóðfélagið, sem mér finnst standa upp úr af þessu gosi,“ segir Páll

Það skeri sig úr frá öðrum eldgosum hvað það sé stöðugt og máttlítið.

„Flest af þeim eldgosum sem við höfum séð hafa verið miklu kröftugri. Byrjað með miklum látum og gassagangi og síðan fjara þau út á tiltölulega stuttum tíma. Þetta gos er búið að vera svona að malla í langan tíma með tiltölulega litlum krafti.“

Páll Einarsson jarðeðlisfræðingur.Egill Aðalsteinsson

Hjálmar horfir líka á gosið sem formaður bæjarráðs Grindavíkur.

„Þetta hefur náttúrlega þýtt alveg gríðarlegan fjölda ferðamanna inn í bæinn, og inn og út úr bænum. Og við höfum svo sem bara fagnað þessu. Ég veit að veitingastaðir og verslanir hafa fengið sinn skerf af því.“

Hjá veitingahúsum í bænum hefur gosið gert meira en að vega upp kreppuástand vegna covid.

„Síðustu mánuðir hafa verið bara mjög góðir, með bestu mánuðum frá upphafi. Og það er bara gosinu að þakka. Meiri traffík í gegn. Allir staðir hérna njóta góðs af því,“ segir Kári Guðmundsson, eigandi veitingastaðarins Fish House Bar & Grill.

Kári Guðmundsson, veitingamaður í Grindavík.Egill Aðalsteinsson

Og gasmengun hefur ekki ógnað bæjarbúum.

„Jafnvel í logninu hérna í Grindavík þá höfum við ekki fengið nein vandræði út af mengun. Og vonum bara að svo verði áfram,“ segir Hjálmar.

Jarðvísindamaðurinn segir engu hægt að spá um goslok.

„Þetta gæti endað snögglega. Sum gos hafa endað mjög snögglega. Það gæti líka mallað svona áfram í mánuði og ár, - þessvegna,“ segir Páll Einarsson.

Hér má sjá frétt Stöðvar 2.

Eldgos í Fagradalsfjalli Eldgos og jarðhræringar Grindavík Almannavarnir Ferðamennska á Íslandi

Tengdar fréttir

Þetta er núna vinsælasti útsýnisstaðurinn á gosið

Drónamyndir sem náðust af gosstöðvunum á Fagradalsfjalli um helgina sýna að hraunelfa flæddi úr eldgígnum um göng og þaðan í átt til Meradala. Slæmt skyggni hefur í dag byrgt sýn að eldgosinu en óróamælar sýna að það hefur haldið fullum dampi.

Eldgosið í Fagradalsfjalli orðið stærra en meðalgos á svæðinu

Vísbendingar eru um að það hægi á landssigi við gosstöðvarnar í Fagradalsfjalli. Magnús Tumi Guðmundsson jarðeðlisfræðingur segir að þær breytingar sem nú sjáist á eldgosinu gætu verið byrjunin á endalokunum. Engu sé þó hægt að slá föstu um goslok.

Hanna varnir fyrir Svartsengi, Grindavík og Reykjanesbraut

Eldgosið í Fagradalsfjalli tók kipp í gærkvöldi með miklum hraunflæðigusum og mældust óróakviðurnar um tíma þær mestu frá upphafi gossins. Byrjað er að hanna varnarmannvirki til að verja Grindavík, Svartsengi og Reykjanesbraut.

Bjarga verðmætum áður en hraunið tekur bæinn

Landeigendur Ísólfsskála keppast nú við að bjarga lausamunum og öðrum verðmætum áður en hraun flæðir yfir jörðina. Á sama tíma er verið að stika nýja gönguleið á stað þaðan sem sést yfir eldgíginn og áformað að opna nýtt bílastæði.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið