Innlent

Stórfelld uppbygging seiðaeldis við Kópasker

Kristján Már Unnarsson skrifar
Fannar Helgi Þorvaldsson, framkvæmdastjóri Rifóss.
Fannar Helgi Þorvaldsson, framkvæmdastjóri Rifóss. Einar Árnason

Einhver mesta uppbygging í sögu Öxarfjarðar fer nú fram við Kópasker. Þar er risin 2.400 fermetra bygging sem fullyrt er að sé stærsta hús í sögu héraðsins.

Frá því síðastliðið haust hafa milli þrjátíu og fjörutíu manns unnið að uppbyggingunni og allt upp í fimmtíu manns, þegar mest hefur gengið á. Að framkvæmdinni stendur fyrirtækið Rifós sem er í eigu Fiskeldis Austfjarða.

„Hér er verið að byggja stórseiðastöð fyrir laxaseiði,“ sagði Fannar Helgi Þorvaldsson, framkvæmdastjóri Rifóss, í beinni útsendingu í fréttum Stöðvar 2.

Seiðin verði síðan flutt til áframeldis í sjókvíum austur á fjörðum.

Aðalbyggingin er 2.400 fermetrar að stærð.Einar Árnason

Ef áform fyrirtækisins ganga eftir er þetta bara byrjunin.

„Vonandi fáum við leyfi til þess að byggja hér fjögur hús. Þannig að hugmyndirnar eru miklar.“

-Hvað mun þetta veita mörgum störf þegar þetta verður allt komið í gang?

„Við reiknum með tuttugu starfsmönnum hérna. Við erum þegar búnir að ráða sex til að vinna hér í þessu húsi,“ svarar Fannar.

Laxaseiði eru komin fyrstu kerin.Einar Árnason

Hann segir góðar aðstæður á Kópaskeri fyrir þessa starfsemi.

„Hér er þetta náttúrlega byggt út af þessum heita sjó sem er hérna. Þannig að þetta eru kjöraðstæður fyrir stórseiðaeldi.“

Starfsemin er þegar hafin, vatn er komið í fyrstu kerin.

„Og fyrstu prufuseiðin mætt. Lítur allt mjög vel út,“ segir Fannar.

Nánar í frétt Stöðvar 2, sem send var út beint frá Kópaskeri:


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×