Innlent

Sterkur sjávarútvegur geti aukið verðmætasköpun um hundruð milljarða

Heimir Már Pétursson skrifar
Samkvæmt skýrslu sérfræðinga til sjávarútvegsráðherra hefur íslenskur sjávarútvegur þróast hratt á undanförnum árum.
Samkvæmt skýrslu sérfræðinga til sjávarútvegsráðherra hefur íslenskur sjávarútvegur þróast hratt á undanförnum árum. Vísir/Vilhelm

Íslenskur sjávarútvegur hefur þróast mikið á undanförnum árum og stendur sterkt og getur aukið verðmætasköpun sína um hátt í þrjú hundruð milljarða á næstu tíu árum. Þetta er niðurstaða viðamikillar skýrslu sérfræðihóps til sjávarútvegsráðherra sem kynnt var í dag.

Skýrslan er unnin að fjórum óháðum sérfræðingum fyrir sjávarútvegsráðherra og spannar allan sjávarútveginn og hliðargreinar hans. Skýrsluhöfundar segja sjávarútveginn standa undir stöðugleika í íslenskum efnahagsmálum og skipta byggðir landsinis miklu máli. Samhliða honum hafi mikilvæg tækni, þjónustu og þróunarfyrirtæki vaxið og dafnað um allt land og skapað ný störf.

Kristján Þór Júlíusson sjávarútvegsráðherra segir skýrsluna sýna að sjávarútvegurinn standi sterkt og framtíðarmöguleikarnir séu miklir.

„Við sjáum í þessari samantekt að af gefnum þeim forsendum sem skýrslan dregur upp að sjávarútvegurinn ætti að geta aukið virði framleiðslu sinnar um hátt í þrjú hundruð milljarða á næstu tíu árum. Sem gæti lagt okkur það lið í að standa vörð um þau lífskjör sem íslendingar vilja búa við,“ segir Kristján Þór.

Kristján Þór Júlíusson segir viðamikla skýrslu um stöðu og horfur í sjávarútvegi og fiskeldi mikilvægt innlegg í umræður um sjávarútveginn.Vísir/Vilhelm

Í skýrslunni kemur meðal annars fram að arðgreiðslur til eigenda sjávarútvegsfyrirtækja hafa verið mun hærri en veiðigjöld á árunum 2013 til 2019. En Ísland sé líka eina ríki Evrópu þar sem sjávarútvegur skilar ríkinu meiri tekjum en ríkið leggur til hans.

Sjávarútvegsráðherra segir að seint muni skapast friður um fiskveiðistjórnunarkerfið þannig að allir verði fullsáttir. Skýrslan gefi hins vegar betra færi á að ræða þau mál á málefnalegum en hægt hafi verið.

Í skýrslunni kemur fram að arðgreiðslur sjávarútvegsfyrirtækja hafa verið mun meiri frá árinu 2013 til 2019 en veiðigjöld. Höfundar skýrslunnar taka ekki afstöðu til þess hvort það sé eðlilegt heldur draga það aðeins fram ásamt öðrum staðreyndum um stöðu sjávarútvegs og fiskeldis.sjávarútvegsráðuneytið

„Hér fáum við hlutlæga og hlutlausa vísindamenn til að draga upp stöðuna í atvinnugreininni eins og hún er. Lýsa henni nákvæmlega. Þanig á þeim grunni geta stjórnmálamenn og aðrir rætt mögulegar væntingar og vilja sinn til breytinga á því sem fyrir liggur,“ segir Kristján Þór.

Höfundar skýrslunnar eru prófessorarnir Sveinn Agnarsson og Sigurjón Arason, Dr. Hörður G. Kristinsson og Dr. Gunnar Haraldsson. Sveinn var jafnframt ritstjóri skýrslunnar. Hann segir styrkleika sjávarútvegsins liggja í hvernig staðið sé að rannsóknum, nýtingu stofnanna, aflamarkskerfinu og frjálsri verðmyndun á innlendum fiskmörkuðum. Þá skipti samþætt sjávarútvegsfyrirtæki miklu máli þar sem veiðar, vinnsla, sala og markaðssetning fari saman.

Sveinn Agnarsson prófessor og ritstjóri skýrslunnar segir koma á óvart hvað samstarf sjávarútvegsfyrirtækja og tækni- og þróunarfyrirtækja hafi vaxið hratt.Stöð 2/Arnar

„Svo er ekki síst þetta mikla samstarf á milli annars vegar sjávarútvegsfyrirtækja og hins vegar tækni og þróunarfyrirtækja. Hvorgur getur án hins verið. Þetta samstarf er mjög mikilvægt,“ segir Sveinn.

Það hafi komið á óvart hvað þessi þróun hafi verið ör og hvað þetta samstarf væri mikilvægt fyrir íslensk fyrirtæki. Nú væru um tvö þúsund og fimm hundruð störf hjá fyrirtækjum í hliðargreinum við sjávarútveginn.


Tengdar fréttir

Bein út­sending: Staða og horfur í sjávar­út­vegi og fisk­eldi

Kristján Þór Júlíusson, sjávarútvegs- og landbúnaðaráðherra, hefur boðað til opins streymisfundar þar sem kynnt verður skýrsla um stöðu og horfur í íslenskum sjávarútvegi og fiskeldi, sem tekin var saman að beiðni ráðherra. Fundurinn hefst klukkan 14.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.