Lífið

130 konur ganga saman á Hvannadalshnjúk um helgina

Sylvía Rut Sigfúsdóttir skrifar
Myndir frá söfnunarverkefninu Lífskraftur á Vatnajökli á síðasta ári.
Myndir frá söfnunarverkefninu Lífskraftur á Vatnajökli á síðasta ári. Lífskraftur

„Ég er svo þakklát og snortin yfir þessum kvennakrafti,“ segir Sirrý Ágústsdóttir, forsprakki tæplega 130 kvenna hóps sem ætlar á topp Hvannadalshnjúks, hæsta tind Íslands, um helgina.

„Ég hlakka svo til að sjá árangur af þessu verkefni, sem mun strax skila sér til svo margra. Ekki bara til þeirra sem eru veikir heldur líka til aðstandenda,“ segir Sirrý í samtali við Vísi. Verkefnið hefur fengið nafnið Kvennadalshnjúkur, þar sem eingögnu konur taka þátt í göngunni. 

Markmiðið með Kvennadalshnjúki er að safna áheitum fyrir bættum aðbúnaði og upplifun sjúklinga með krabbamein á nýrri blóð-og krabbameinsdeild Landspítalans. Jafnframt er markmiðið með átakinu að hvetja fólk til útivistar og hreyfingar í leiðinni. Sjálf sigraðist Sirrý tvisvar á krabbameini og spilaði útivistin stórt hlutverk í hennar bataferli.

„Heilsan er frábær og æfingar hafa verið góðar og fjörugar hjá Snjódrífum ásamt öllum Kvennadalskonum,“ segir Sirrý um undirbúninginn.

Sirrý stóð einnig fyrir göngu þvert yfir Hvannadalshnjúk í júní á síðasta ári, þegar hún fagnaði þess að vera laus við krabbameinið í fimm ár. Undir nafninu Lífskraftur söfnuðu þær sex milljónum fyrir félögin Lif og Kraftur, eins og fjallað var um á Vísi á síðasta ári.

Planið var að fara strax á hnjúkinn í kjölfarið í þessa einstöku kvennaferð en vegna stöðunnar á faraldrinum síðasta vor þurfti að fresta verkefninu. Nú er loksins komið að þessu og hefur kvennahópnum verið skipt upp í nokkur sóttvarnarhólf til þess að draga úr smithættu í ferðinni.

Í hópnum er meðal annars Áslaug Arna Sigurbjörnsdóttir dómsmálaráðherra, sem var verndari Lífskrafs-ferðar Sirrý og Snjódrífanna á Vatnajökul á síðasta ári. 

Vilborg Arna Gissurardóttir og Soffía Sigurgeirsdóttir eru í hópi þeirra sem skipuleggja gönguna á Kvennadalshnjúkinn núna um helgina, Vilborg leiðir hópinn og Soffía verður í grunnbúðum og í stöðugu sambandi við þær.

Vilborg Arna Gissurardóttir og Sirrý Ágústsdóttir leggja af stað í annað ævintýri saman um helgina. Þessi ferð verður þó heldur styttri en ferðin þeirra á Vatnajökul síðasta sumar.Vísir/Vilhelm

Þær ræddu ferðina í Bítinu á Bylgjunni í morgunn og má heyra viðtalið í spilaranum hér fyrir neðan.

„Það fer svolítið eftir þessari lægð sem er núna að stríða okkur, hvenær nákvæmlega við förum af stað, segir Soffía um planið þeirra.“

Eins og staðan er núna stefna þær á að ganga á toppinn 2. maí og leggja því af stað á miðnætti ef allt gengur upp.

„Þetta er lengsta dagleiðin í óbyggðum ferðum í Evrópu, þetta eru 25 kílómetrar og 2110 sirka. Það veit enginn nákvæmlega hæðina núna.“

Hópurinn hefur æft út frá æfingaráætlun frá áramótum og fóru allar meðal annars tvær ferðir upp og niður Esjuna í vor.

Þær hvetja landsmenn að styðja við átakið með því að með því að senda SMS í símanúmerið 1900.

Sendið textann LIF1000 fyrir 1.000 krónur.

Sendið textann LIF3000 fyrir 3.000 krónur.

Sendið textann LIF5000 fyrir 5.000 krónur.

Sendið textann LIF10000 fyrir 10.000 krónur.

Einnig er hægt að styðja við Lífskraft með því að leggja inn á reikning 1161-26-9900, kt. 501219-0290, eða með AUR appinu í síma 789 4010.


Tengdar fréttir

100 konur á „Kvenndalshnúk“ í maí

Snjódrífurnar vöktu athygli landsmanna þegar þær gengu Vatnajökul í fyrra og söfnuðu pening fyrir Líf og kraft. Í vor stefna 100 konur á Hvanndalshnúk, eða „Kvenndalshnúk“ eins og hann er kallaður af hópnum þar sem aftur verður safnað til góðgerðarmála.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.