Innlent

Miklar breytingar á starfi á Háskólatorgi og Gimli

Kolbeinn Tumi Daðason skrifar
Slökkvilið mætti á vettvang í nótt og hefur starfsfólk auk þess aðstoð mikið við að draga úr tjóni.
Slökkvilið mætti á vettvang í nótt og hefur starfsfólk auk þess aðstoð mikið við að draga úr tjóni. Vísir/Egill

Jón Atli Benediktsson, rektor Háskóla Íslands, segir að öll kennsla sem fram hafi farið í húsakynnum Háskólatorgs og Gimli verði nú rafræn. Þá verður jarðhæð í Gimli ónothæf næstu mánuði og sama gildi um fyrirlestrarsali á jarðhæð á Háskólatorgi.

Þetta kemur fram í tölvupósti Jóns Atla til nemenda við HÍ. Mikið tjón varð í nokkrum byggingum skólans í nótt eftir að rof varð á aðalkaldavatnsæð Veitna við Suðurgötu á öðrum tímanum í nótt. Lekinn stóð í um 75 mínútur og runnu út um 2250 tonn af vatni.

Skýringin á þessu mikla vatnsmagni að sögn Veitna er sú að stofnæðin sem fór í sundur er stór enda er hún ein af megin flutningsæðum á köldu vatni fyrir Vesturbæ Reykjavíkur. Unnið hefur verið að endurnýjun hennar, sem og öðrum Veitulögnum á Suðurgötu, undanfarið.

Lekinn stóð í 75 mínútur, var um 500l/s og runnu alls út um 2.250 tonn af vatni. Stofnæðin sem fór í sundur er ein af megin flutningsæðum á köldu vatni fyrir Vesturbæ Reykjavíkur. Unnið hefur verið að endurnýjun hennar, sem og öðrum Veitulögnum á Suðurgötu, undanfarið.Vísir/Egill

„Ljóst er að verulegt tjón hefur orðið í allmörgum byggingum Háskóla Íslands vegna mikils vatnsleka í nótt en allt kapp er lagt á að röskun á starfi skólans verði sem minnst,“ segir Jón Atil í orðsendingu sinni.

Eftirfarandi liggi þó fyrir í framhaldi af vinnu á vettvangi í nótt og í morgun:

Öll kennsla sem fram hefur farið í húsakynnum Háskólatorgs og Gimli verður nú rafræn.

Jarðhæð í Gimli verður ónothæf næstu mánuði og sama gildir um fyrirlestrasali á jarðhæð á Háskólatorgi.

Hægt er að nálgast þjónustu skrifstofu Félagsvísindasviðs símleiðis eða með rafrænum hætti fram að helgi.

Verið er að leita að hentugu húsnæði fyrir skrifstofu Félagsvísindasviðs og til staðkennslu vegna þeirra rýma sem ekki er unnt að nýta vegna vatnstjónsins.

Þjónustuborð á Háskólatorgi verður opið á skrifstofutíma. Fólk er þó hvatt til að nýta rafrænar þjónustuleiðir eins og nokkur er kostur.

Háma og Bóksalan á Háskólatorgi eru lokuð í dag en verða opnuð á morgun.

Stúdentakjallarinn er lokaður en verður opnaður á laugardag.

Jón Atli biður starfsfólk í þeim byggingum þar sem vatnstjón varð, á Háskólatorgi, í Gimli, Lögbergi, Árnagarði og í Aðalbyggingu, að hafa samband við næstu stjórnendur varðandi tilhögun vinnu í dag og út vikuna.

„Mér er efst í huga þakklæti til þeirra fjölmörgu, starfsfólks okkar og slökkviliðs, sem lögðu afar hart að sér í nótt við erfiðar aðstæður við að draga úr tjóni eins og unnt var,“ segir Jón Atli.

Þá þakkar hann nemendum og starfsfólki skólans fyrir seiglu og samstöðu.

Veitur harma atvikið 

Í tilkynningu frá Veitum kemur fram að fyrirtækið vinni nú hörðum höndum að því að greina hvað varð þess valdandi að hið mikla magn vatns flæddi inn í skólann. 

„Starfsfólk Veitna var að störfum í nótt og ljóst er að eignatjón er umtalsvert en sem betur fer urðu engin slys á fólki. Veitur harma atvikið og þær afleiðingar sem það hefur haft í för með sér fyrir nemendur og starfsfólk Háskóla Íslands og aðra.“

Veitur segjast strax í morgun hafa haft samband við rektor Háskóla Íslands og boðið fram alla þá aðstoð sem hægt væri að veita í þessum erfiðu aðstæðum. Einnig hafi Veitur verið í góðu sambandi við aðra hagaðila.

„Ljóst er að upptök þessa kaldavatnsleka eru í lokahúsi vatnveitu sunnan við aðalbyggingu HÍ. Hans varð vart í stjórnstöð Veitna um klukkan 01:00 í nótt og var bakvakt kölluð út í kjölfarið. Hálftíma eftir að bakvakt kom á staðinn var búið að staðsetja stofnæðarlokann og loka fyrir. Lekinn stóð í 75 mínútur, var um 500l/s og runnu alls út um 2.250 tonn af vatni.“


Tengdar fréttir

Skoða hver ábyrgð Veitna sé vegna tjónsins í HÍ

Arn­dís Ósk Ólafs­dótt­ir, for­stöðumaður vatns- og frá­veitu hjá Veit­um, segir að það eigi eftir að koma í ljós hvort fyrirtækið sé skaðabótaskylt vegna vatnstjónsins sem varð í byggingum Háskóla Íslands í nótt eftir að stór kaldavatnslögn við skólann rofnaði með tilheyrandi vatnsleka.

Gryfjan í Stúdenta­kjallaranum „eins og sund­laug“

Rebekka Sigurðardóttir, upplýsingafulltrúi Félagsstofnunar Stúdenta, sem rekur Stúdentakjallarann, Bóksölu stúdenta og veitingasöluna Hámu á Háskólatorgi segir ekki ljóst hversu mikið tjón stofnunarinnar er vegna vatnslekans sem varð í Háskóla Íslands í nótt.

Háskóli Íslands er ekki tryggður fyrir tjóninu

Háskóli Íslands er ekki tryggður fyrir tjóninu sem varð vegna gríðarlegs vatnsleka í fimm byggingum skólans í nótt, að sögn rektors. Hann segir ljóst að tjónið sé gríðarlegt og hafi einmitt orðið í þeim skólastofum sem eru í notkun í kórónuveirufaraldrinum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.