Minnisstæðast að geta bjargað fólki

Fimm ár eru í dag liðin frá jarðskjálftanum á Haítí og enn eru aðstæður þar afar erfiðar.

Skjálftinn var sjö á Richter og lagði höfuðborginai Port-au-Prince nánast í rúst. 220 þúsund manns létu lífið og 300 þúsund slösuðust.

Frammistaða íslensku Alþjóðabjörgunarsveitarinnar vakti mikla athygli á sínum tíma, enda var hún fyrst á staðinn og í meðfylgjandi myndskeiði má sjá myndir af henni að störfum á vettvangi.

„Það þótti mjög einkennilegt hvað við náðum að bregðast fljótt við,“ segir Bragi Reynisson, stjórnandi íslensku Alþjóðabjörgunarsveitarinnar. „Menn voru búnir að setja okkur í annan flokk og gert var ráð fyrir að við yrðum lengi á leiðinni, því við vorum svo langt frá þessum helstu skaðasvæðum.“

Sveitin vann að grófri rústaleit og bjargaði auk þess þremur úr bráðri lífshættu.

Hvað stóð upp úr eftir þessa sjö daga á staðnum?

„Það er náttúrlega fyrst og fremst að geta bjargað einhverjum,“ segir Bragi. „Og ekki bara að geta bjargað einhverjum út úr rústum heldur líka bara að geta verið til staðar fyrir almenning í landinu og látið gott af sér leiða með þeim hætti.“

Sveitin skildi auk þess eftir hjálpargögn fyrir um tíu milljónir króna enda þótti ekki forsvaranlegt að taka þau með heim þar sem aðstæður voru afar slæmar. Bragi segir ástandið lítið hafa breyst á svæðinu og að enn búi fólk í tjöldum og hálfhrundum húsum. Hins vegar hafi hamfarirnar orðið til framfara í þekkingu á hættusvæðum og nýsköpunar fyrir aðstæður sem þessar. „Þetta kveikti í mjög mörgum að láta gott af sér leiða  og reyna að koma með nýjungar inn í þennan heim,“ segir hann.

Bragi þakkar almenningi stuðning við sveitina.

Myndirðu fara aftur ef útkallið kæmi í dag?

„Ekki spurning, ég myndi ekki hika við það,“ segir hann að lokum með áherslu.