Stúlkan sem greindist með E.coli á batavegi

Stúlkan sem greindist með E.coli bakteríu fyrir þremur vikum er nú á batavegi. Landlæknisembættið greinir frá þessu.

Stúlkan er tveggja og hálfs árs gömul til heimils á Akureyri. Hún var meðhöndluð á gjörgæsludeild Landspítalans með blæðandi garnasýkingu af völdum E.coli bakteríu, sem myndar eiturefni.

Rannsókn málsins hefur beinst að því að finna fleiri tilfelli og frá hvaða matvælum sýkingin kann að hafa borist. Einnig var mælst til að börn á þeim leikskóla á Akureyri sem stúlkan sækir dveldust heima ef þau væru með niðurgang. Tekin voru sýni frá sex öðrum börnum frá leikskólanum sem ekki reyndust vera með smit af völdum þessarar bakteríu.

Ekki hefur tekist að sýna fram á sýkingarvald í sýnum frá matvælum.

Í tilkynningu embættisins kemur fram að til að draga úr líkum á smiti sé mikilvægt að hreinlætis sé gætt, með því að þvo sér oft um hendur, tryggja fullnægjandi hitun matvæla þar sem það á við, koma í veg fyrir krossmengun matvæla og skola vel grænmeti.

Nánari upplýsingar um blæðandi garnasýkingu af völdum E. coli má finna á síðunni Enterohemoragísk E. coli á vef Embættis landlæknis.