Tveggja ára stúlka með E.coli-bakteríu - Fá tilfelli á ári

Rúmlega tveggja ára stúlka á Akureyri greindist með E.coli-bakteríu. Flytja þurft stúlkuna með sjúkraflugi til Reykjavíkur fyrir um tveimur vikum þar sem hún var í öndunarvél í tvær vikur á Landspítalanum. Vikudagur á Akureyri sagði frá þessu í dag.

Stúlkan hefur nú verið útskrifuð af sjúkradeild og er á batavegi. Hún er undir ströngu eftirliti á spítalanum.

E.coli-bakterían framleiðir ákveðna tegund eiturefnis að sögn Guðrúnar Sigmundsdóttur, yfirlæknis á sóttvarnasviði hjá embætti Landslæknis. Eiturefnið getur valdið slæmum veikindum og þá sérstaklega hjá ungum börnum.

Guðrún segir að það sé frekar sjaldgæft að bakterían greinist hér á landi. Um er að ræða tvö til þrjú tilvik á ári.

Bakterían berst yfirleitt með vatni og mat. „Það er til í dæminu að hún smitist manna á milli,“ segir Guðrún.

Bakterían smitast eins og aðrar bakteríur sem berast með matvælum og vatni. Gott hreinlæti við meðhöndlun matvæla dregur úr líkum á smiti að sögn Guðrúnar.

Í tilviki stúlkunnar hafi hennar nánasta umhverfi verið rannsakað í þaula í samstarfi við Matvælastofnun og heilbrigðisfulltrúa og lækna á  Akureyri. Ekkert hafi fundist sem gat skýrt hvers vegna hún smitaðist.

„Það virðist ekki vera neinn faraldur í gangi, þessi baktería greinist í tvö til þrjú skipti á ári og þetta tilfelli virðist eitt þeim,“ segir Guðrún.

Þegar fólk verður veikt vegna bakteríunnar hefur það gengið með hana í nokkra daga og allt upp í viku. Því er erfitt að sögn Guðrúnar að finna hvaðan bakterían kom.