Stakk lögregluna af á 185 kílómetra hraða

Ökumaður var mældur á 161 kílómetra hraða á Skógasandi á laugardagskvöld og stöðvaði ekki för þegar lögregla gaf honum merki. Hann jók ferðina og náði að komast undan lögreglunni.

Bifreiðin fannst svo yfirgefin nokkru síðar í Vík. Eigandi bifreiðarinnar fannst síðan daginn eftir og gekkst hann við brotinu samkvæmt upplýsingum frá lögreglunni á Hvolsvelli. Hann viðurkenndi að hafa ekið á allt að 185 kílómetra hraða við að komast undan lögreglunni.

Lögreglan segir það vera mikla mildi að ekki hlaust slys af þessu atviki. Maðurinn var samstundis sviptur ökuleyfi til bráðabirgða.