Hafa hugleitt að loka landinu

Nefnd á vegum ríkisstjórnarinnar vinnur að undirbúningi og stýrir samstarfi vegna hættunnar á heimsfaraldri inflúensu. Haraldur Briem sóttvarnalæknir segir þennan hátt hafðan á, því nýr inflúensufaraldur myndi snerta öll svið samfélagsins. Hann segir sóttvarnir þó eftir sem áður á ábyrgð sóttvarnalæknis undir yfirstjórn heilbrigðisráðherra. Nefndinni stýra Davíð Á. Gunnarsson, ráðuneytisstjóri í heilbrigðisráðuneytinu og formaður framkvæmdastjórnar Alþjóðaheilbrigðismálastofnunarinnar (WHO) og Þorsteinn Geirsson, ráðuneytisstjóri dómsmálaráðuneytis. Haraldur segir stöðugt unnið að endurskoðun viðbúnaðaráætlunar vegna hættunnar á nýjum flensufaraldri, enda kalli hún á eilífar endurskoðanir í ljósi nýrra upplýsinga, en fylgt verði alþjóðlegum tilmælum WHO um viðbrögð. "Þar er fylgt ákveðnu ferli sem miðast við skilgreind viðbragðsstig," segir hann, en meðal þess sem rætt hefur verið er hvort tími gæti unnist til að "loka landinu" ef upp kæmi nýr flensustofn annars staðar í heiminum. "Almennt er talið að þjóðir heims geti ekki varið sig með þeim hætti í heimsfaraldri inflúensu vegna þess hve smitandi hún er og samgöngur eru hraðar í nútíma samfélagi," segir Haraldur, en bætir við að fræðilega sé þetta þó kostur fyrir eyríki á borð við Ísland, en afar erfitt í framkvæmd. "Hvernig eigum við að bregðast við gagnvart þeim tugum þúsunda Íslendinga sem eru erlendis á hverjum tíma? Þolir landið langvarandi stöðvun á öllum aðföngum frá útlöndum? Þetta er vandamál sem þarf að huga vel að því búast má við að dragi mjög úr ferðamennsku og innflutningi í heimsfaraldri inflúensu. Við þurfum með öðrum orðum að búa okkur undir það með hvaða hætti við bregðumst við þegar inflúensan er komin til landsins," segir hann, en í því felst meðal annars að meta þarf þörf landsins fyrir aðgang að lyfjum sem vitað er að vinna á inflúensu og að tryggja aðgang að þeim. Þegar er hafin hjá lyfjafyrirtækjum þróun á mögulegu bóluefni við nýjum inflúensustofni, en Haraldur hefur ekki trú á að slíkt efni verði til í upphafi heimsfaraldurs. "En vonir standa til að hægt verði að stytta biðtímann frá fjórum til sex 6 mánuðum í um það bil tvo mánuði."