Vilja hefja tilraunaeldi í vor

Forsvarsmenn Arnarlax á Bíldudal gera ráð fyrir að tilraunaeldi á laxi í Arnarfirði geti hafist næsta vor, en síðustu þrjú ár hefur fyrirtækið kannað aðstæður á svæðinu. Umsóknir um starfsleyfi og rekstrarleyfi fyrirtækinu til handa liggja nú hjá Umhverfisstofnun og Fiskistofu, að því er fram kemur í tilkynningu frá Arnarlaxi.

Samhliða tilraunaeldinu verður ráðist í uppbyggingu á vinnsluhúsnæði og seiðaeldi í landi. Eftir fimm ár er gert ráð fyrir því að framleiðsla Arnarlax, með tilheyrandi fullvinnslu afurða á neytendamarkað, verði um þrjú þúsund tonn á ári. Í tilkynningunni segir einnig að fimmtíu ný störf geti orðið til við uppbygginguna, en heildarkostnaður á bak við verkefnið verði um þrír milljarðar króna.

Stór fyrirtæki í Noregi og Danmörku, bæði á sviði eldis, vinnslu og markaðssetningar, eru á meðal þeirra sem standa á bak við Arnarlax.

Aðstæður til eldis í Arnarfirði þykja ákjósanlegar að mati sérfræðinga. Í Harðangursfirði í Noregi eru svipaðar aðstæður og þar eru framleidd 30 til 40.000 tonn af laxi á ári, að því er Arnarlax segir.- þj