Íslendingar skilja ekki teppi

„Að Íslendingar skilji ekki teppi? Nei, þeir gera það nú sennilega ekki. Og svo sem enginn móðgaður yfir því. En þau fóru langt undir matsverði," segir Tryggi Páll Friðriksson í Galleríi Fold.

Metaðsókn var á uppboði sem Fold stóð fyrir í Súlnasal Hótels Sögu á sunnudag. Og er Tryggvi Páll mjög ánægður með uppboðið í heild sinni. Metupphæð fékkst fyrir vatnslitaverk eftir Ásgrím Jónsson, eða 8,9 milljónir sem leggur sig á rúmar tíu milljónir með gjöldum. Og málverk eftir Þorvald Skúlason var slegið á 6,5 milljónir. Tryggvi er sæll og glaður með hvernig til tókst og segir þetta staðfesta nokkurn uppgang í listmunasölu hér á landi.

En það er þetta með teppin. Á uppboðinu voru boðin upp níu teppi, handofin, og voru þau flest metin í uppboðsskrá á um 400 þúsund. En þau voru slegin langt undir því verði. Fóru á að meðaltali hundrað þúsund krónur. Tryggvi segir ljóst að einhverjir hafi þarna gert afar góð kaup. „Menn voru að gera þarna góð teppakaup. En ég er bara ánægður með að hafa komið þessu út. Okkar hlutverk er að selja þetta." Og uppboðshaldarinn og galleríeigandinn bendir á að ekki sé nema eitt rétt verð og það er markaðsverð hverju sinni.

Að sögn Tryggva þykja teppi á borð við þau sem boðin voru upp í Súlnasalnum munaðarvara hvarvetna í víðri veröld.

„Það verður að segjast eins og er. Ég hef kynnt mér þetta af áhuga og þá hefur verðið á þessu teppadóti alltaf verið miklu hærra en við höfum getað útvegað okkur þau á hér. Þetta eru ofsalega fínir hlutir. Handofnir. Þetta er flott, þú gengur á þessu endalaust og ekki sést á þessu."

Tryggvi fór á kostum á uppboðinu, sagði sögur, brandara og lék við hvurn sinn fingur. Sagði að það tæki eitt ár að gera handofin teppi sem þessi. Og lofaði tvö hundruð ára ábyrgð.

„Þetta er óhemju vinna. Ofið í þessum fjallahéruðum, Indlandi og Kína, og fátækt fólk sem vefur þetta. Ákveðnar hefðir og ákveðin mynstur fylgir ættbálkum og tilteknum héruðum. Menn komast ekki áfram með svona teppi nema nokkra sentimetra á dag," segir Tryggvi en sýtir svo sem ekki áhugaleysi uppboðsgesta á teppunum.