Reykjavíkurborg selur fasteignir fyrir 1,2 milljarða

Borgaryfirvöld stefna að því að flytja framkvæmdasvið, skipulags- og byggingasvið og umhverfissvið allt undir eitt þak í Borgartúni 10-12 og selja fasteignirnar í Borgartúni 1, Borgartúni 3, Skúlatúni 2 og Hverfisgötu 14-14a þar sem þessi starfsemi hefur verið til húsa.

Samkvæmt drögum að kaupsamningi kaupir rekstrarfélagið Höfðatorg fasteignirnar fjórar fyrir samtals 1.200 milljónir króna. Borgin leigir svo sjö þúsund fermetra húsnæði í Höfðatorgi númer 10-12 við Borgartún á tæpar þrettán milljónir króna á mánuði.

Eykt byggir húsnæðið sem afhendist 1. október 2007, en Eykt er jafnframt aðaleigandi rekstrarfélagsins Höfðatorgs.

Í greinargerð til borgarráðs segir Hrólfur Jónsson, sviðsstjóri framkvæmdasviðs, að húsnæðismál skipulags- og byggingasviðs verði að bæta þar sem verulega þrengi að því við Borgartún 3. Umhverfissvið sé í leiguhúsnæði við Skúlagötu og samningurinn renni út fljótlega. Húsnæðismál framkvæmdasviðs í Skúlatúni 2 séu hins vegar í ágætu lagi.

„Verulegt hagræði er að því að koma þessum þremur sviðum fyrir undir sama þaki. Þar að auki hefur verið lagt til að Upplýsinga- og tæknimiðstöð borgarinnar sem nú er til húsa í Borgartúni 1 verði með í nýju húsnæði," segir þar.

Til greina kemur að símaver í Hafnarstræti verði flutt á sama stað og að Bílastæðasjóður, sem nú er til húsa á Hverfisgötu, verði einnig í sameiginlegu húsnæði. Þá þykir koma til greina að þjónustumiðstöð Miðbæjar og Hlíða flytjist í þetta nýja húsnæði.

Tillagan nú liggur fyrir borgarráði þó að fyrir liggi ákvörðun frá árunum 2004 um að flytja starfsemi þessara sviða í Lækjargötu 12. Flutningi í Höfðatorg var þá hafnað. Í greinargerðinni segir Hrólfur að sá kostur komi ekki til greina lengur af ýmsum ástæðum.

„Við skipulagsvinnu á lóðinni hefur húsið minnkað nokkuð og er það ekki talið nógu stórt lengur til að hýsa þessi þrjú svið. Enn fremur hafa tillögur um að önnur starfsemi flytjist einnig í sama hús aukið enn frekar húsnæðisþörfina.