Íbúi heyrði fyrst af eldsvoðanum í fréttunum

„Ég vaknaði upp við lætin. Síðan bölvaði ég í hljóði og hugsaði með mér af hverju menn gætu ekki bara farið að vinna klukkan átta eins og allir aðrir," segir íbúi í blokkinni við Einivelli sem kviknaði í snemma í morgun. Par var flutt með reykeitrun á sjúkrahús en íbúinn sem Vísir ræddi við bjó beint fyrir neðan þau.

Hann varð ekkert var við eldsvoðann né slökkviliðsmennina sem athöfnuðu sig með tilheyrandi umstangi þegar eldar eru slökktir.

„Það var ekki fyrr en ég var á leiðinni í vinnuna um sjö sem ég heyrði um eldsvoðann í fréttunum," segir íbúinn sem þykir sérstakt að hvorki slökkvilið né lögregla hafi látið íbúa vita um eldinn.

Þess má geta að stigagangurinn er utanáliggjandi og því var enga lykt að finna þar.

Að sögn slökkviliðs gekk slökkvistarfið vel en tilkynnt var um eldinn klukkan tuttugu mínútur yfir fimm og voru menn að ljúka störfum um sexleytið.

Allt tiltækt slökkvilið var kallað á staðinn en í húsinu búa á bilinu 40 til 50 manns. Ekki reyndist þó þörf á því að rýma húsið. Óljóst er um eldsupptök en að sögn lögreglu er hugsanlegt að eldurinn hafi komið upp í sófa í stofunni.