Sömu kröfur gerðar til bankastjóranna

Tveir voru metnir mjög vel hæfir í stöðu Seðlabankastjóra, Már Guðmundsson og Arnór Sighvatsson, en þrír voru metnir vel hæfir. Þeirra á meðal voru Yngvi Örn Kristinsson og Tryggvi Pálsson. Báðir sóttu þeir einnig um stöðu aðstoðarseðlabankastjóra og voru metnir mjög vel hæfir til hennar. Sömu hæfniskröfur eru gerðar til seðlabankastjóra og aðstoðarseðlabankastjóra.

Í lögum um Seðlabanka Íslands segir það eitt að seðlabankastjóri og aðstoðarseðlabankastjóri „skulu hafa lokið háskólaprófi í hagfræði eða tengdum greinum og búa yfir víðtækri reynslu og þekkingu á fjármálastarfsemi og efnahags- og peningamálum."

„Einu lagafyrirmælin eru um þessa prófgráðu," segir Jónas Haralz, formaður matsnefndar sem hafði það verkefni að meta hæfni umsækjenda um báðar stöðurnar.

Um ástæðu þess að Tryggvi og Yngvi hafi verið metnir mjög vel hæfir til aðstoðarseðlabankastjóra en vel hæfir til Seðlabankastjóra, segir Jónas að ýmislegt geti komið til greina. „Það sem kæmi til greina væri til dæmis reynsla manna og verkefni sem þeir hafa unnið að," segir Jónas. Hann segist ekki geta gefið nákvæmari upplýsingar um hvað hafi ráðið niðurstöðu nefndarinnar.

Álfheiður Ingadóttir, formaður viðskiptanefndar sagði við aðra umræðu í meirihlutaáliti viðskiptanefndar um frumvarpið að sömu hæfniskröfur væru fyrir seðlabankastjóra og aðstoðarseðlabankastjóra.

Trausti Fannar Valsson, lektor í stjórnsýslurétti við lagadeild Háskóla Íslands, segir ræðuna geta verið lögskýringargagn ef málið fari til Umboðsmanns Alþingis eða til dómstóla. Hann segir að almenna reglan sé sú að sá sem veiti starf hafi vald til að ákveða hvað henti starfinu og hvað lagt sé áhersla á við matið.

„Þótt sömu almennu hæfisskilyrði gildi getur verið einhver sérstök áhersla sem forsætisráðherra kann að leggja til grundvallar," segir Trausti.

Birgir Ármannsson, sem flutti ræðu fyrir minnihluta viðskiptanefndar í umræðu um frumvarpið, segir að í lögunum hafi verið gert ráð fyrir að sömu hæfisskilyrði giltu um báðar stöðurnar.

„Auðvitað er við ráðningar í störf byggt á einhverju mati og auðvitað getur verið mismunandi mat varðandi það hvort um aðal- eða aðstoðarseðlabankastjóra er að ræða," segir Birgir.