Þriðja kvikmynd leikstjórans Christopher Nolans um Leðurblökumanninn, The Dark Knight Rises, var frumsýnd í gær.

The Dark Knight Rises gerist átta árum eftir að Leðurblökumaðurinn tókst á við Jókerinn í The Dark Knight og hefur hetjan verið í felum síðan þá. Bruce Wayne hefur dregið sig í hlé á heimili sínu Wayne Manor og fyrirtæki hans, Wayne Enterprises, er á barmi gjaldþrots. Leðurblökumaðurinn er þó dreginn úr fylgsni sínu þegar glæpamaðurinn Bane lætur á sér kræla og ræðst á hlutabréfamarkað Gotham City og gerir þar með fyrirtæki Wayne gjaldþrota. Kattarkonan Selina Kyle leiðir Batman til Bane og upphefst að nýju bardagi milli góðs og ills í Gotham-borg.

Kvikmyndin er þriðja og síðasta mynd breska leikstjórans Christophers Nolan um Leðurblökumanninn, en Nolan bar hugmyndina um þríleikinn undir Warner Bros og leikstýrði í kjölfarið Batman Begins, frá árinu 2005, og The Dark Knight, frá árinu 2008. Handritin skrifaði Nolan ásamt yngri bróður sínum, handritshöfundinum Jonathan Nolan.

Sem áður fer stórleikarinn Christian Bale með hlutverk Leðurblökumannsins og Michael Caine fer með hlutverk yfirþjóns Wayne, Alfred Pennyworth. Anne Hathaway leikur Kattarkonuna og Tom Hardy tekur að sér hlutverk illmennisins Bane. Með önnur hlutverk fara gæðaleikararnir Gary Oldman, Marion Cotillard, Joseph Gordon-Levitt og Morgan Freeman.

Leðurblökumaðurinn á sér marga aðdáendur og kemur því lítið á óvart að The Dark Knight Rises hefur fengið góða dóma víðast hvar og þeir gagnrýnendur sem fóru síður lofsamlegum orðum um myndina fengu holskeflu fúkyrða yfir sig frá einlægum aðdáendum myndanna. Þeirra á meðal var gagnrýnandi The Associated Press, Christy Lemire. „Ég held að aðdáendur Leðurblökumannsins séu mjög ástríðufullir og umhugað um þessar persónur. Leðurblökumaðurinn hefur verið til í meira en 70 ár og það er ástæða fyrir því,“ sagði Nolan er hann kom aðdáendum ofurhetjunnar til varnar.