Bloggar um 52 bækur á einu ári

Kennarinn Trausti Þorgeirsson setti sér óvenjulegt áramótaheit fyrir árið 2013.

Framhaldsskólakennarinn Trausti Þorgeirsson ætlar að lesa 52 bækur árið 2013 og skrifa stuttlega um hverja og eina þeirra á bloggsíðu sinni.

Fyrir um ári síðan byrjaði Trausti að skrifa niður í bók hvaða skáldsögur hann væri að lesa en það datt fljótlega upp fyrir. „Ég var farinn að hafa áhyggjur af því að ég væri farinn að gleyma hvaða bækur ég hefði lesið og fannst mikilvægt að skrá þetta niður,“ segir hann. „Svo var ég að horfa á bíómynd á Rúv um jólin, Julie & Julia. Þar er stúlka sem setur sér það markmið að elda 365 mataruppskriftir upp úr matreiðslubók og blogga um reynsluna. Mér datt í hug að yfirfæra þessa hugmynd á bókalestur og nota bloggið til að aga mig við skriftirnar,“ segir Trausti, sem kennir stærðfræði og tölvunarfræði við Menntaskólann í Reykjavík.

Hann hefur alla tíð verið mikill bókaormur og vill með athæfinu hvetja nemendur sína til að lesa meira í frístundum sínum. „Ég las í Wall Street Journal að George W. Bush [fyrrum Bandaríkjaforseti] hefði lesið 95 bækur árið 2006 þegar hann var leiðtogi hins frjálsa heims. Hann hafði nóg að gera en samt gat hann lesið næstum því hundrað bækur. Ég heyri stundum frá nemendum að þeir hafi ekki tíma til að lesa annað en kennslubækurnar. Mér finnst þetta svo léleg afsökun og þess vegna lít ég á þetta sem hvatningu fyrir nemendur mína. Þeir þurfa að vera tilbúnir til að lesa meira og hafa gaman af því,“ segir hann. Hugleiðingar Trausta um bækurnar má finna á slóðinni http://52baekur.blogspot.com. -fb