Víðtækt samráð um samningsmarkmið

Þáttaskil eru í utanríkisstefnu Íslands við ákvörðun ríkisstjórnar Samfylkingarinnar og VG um að leggja fram tillögu á Alþingi um að sækja um aðild að Evrópusambandinu.

Utanríkisráðherra mun leggja tillöguna fram á fyrstu starfsdögum þingsins en þingsetning verður á föstudag.

Í stjórnarsáttmálanum segir að víðtækt samráð verði á vettvangi Alþingis og við hagsmunaaðila um samningsmarkmið og umræðugrundvöll viðræðnanna. Enn fremur er tekið fram að stuðningur stjórnvalda við samninginn, þegar hann liggur fyrir, sé háður ýmsum fyrirvörum um niðurstöðuna út frá hagsmunum Íslendinga í sjávarútvegs-, landbúnaðar-, byggða- og gjaldmiðilsmálum, í umhverfis- og auðlindamálum og út frá almannaþjónustu.

Andrési Péturssyni, formanni Evrópusamtakanna, lýst ágætlega á þessa fyrirætlan ríkisstjórnarinnar. „Þegar til lengri tíma er litið er eflaust betra að þingið fái að tjá sig um málið svo það fari þá með blessun þess. Ég vona bara að menn leggist ekki í málþóf." Andrés er bjartsýnn á að tillaga um aðildarviðræður verði samþykkt og sömuleiðis að samningur við Evrópusambandið verði okkur hliðhollur. „Ef hann verður slæmur þýðir það bara að ESB vill ekki fá okkur inn."

Ragnar Arnalds, formaður Heimssýnar, er ósáttur við áform ríkisstjórnarinnar. „En þarna eru fimm þingmenn sem eru ákveðnir í að greiða atkvæði á móti og þeir geta orðið fleiri. Það stefnir í mikið samningaþóf," segir hann og minnir á að afstaða stjórnarandstöðunnar sé ekki einhlít heldur. Ragnar telur samskiptum Íslands og ESB teflt í hættu. „Það er vafalaust ekki hægt að gera samskiptum ESB og Íslands jafn mikinn grikk og þann að fara í aðildarviðræður og fella samninginn svo í þjóðaratkvæðagreiðslu. Þetta hefur komið Norðmönnum í koll." bjorn@frettabladid.is