Kate Moss forðast Pete Doherty eins og heitan eldinn

Kate Moss hefur skipt um símanúmer í heimasímanum sínum og gemsanum til að hennar fyrrverandi, Pete Doherty, geti ekki hringt í hana. Moss henti Doherty út fyrir skemmstu eftir að upp komst að hann hefði haldið framhjá henni með 29 ára Suður-Afrískri fyrirsætu.

Hún skipti í kjölfarið um alla lása á heimili sínu og réð flutningamenn til að fjarlægja alla hluti hans. Þetta hélt hún að væri nóg til að koma honum í skilning um að hún vildi ekkert með hann hafa, en svo reyndist ekki vera, og hún greip því til þess ráðs að skipta um símanúmer.

Á mánudaginn greindi Daily Mail frá því að Kate ætlaði að borga fyrir lyfið Naltrexone fyrir Pete, en það er notað til að hjálpa mönnum að hætta heróínnotkun. Það virðist hinsvegar verða það síðasta sem hún gerir fyrir hann.

,,Kate er mikið í mun að hefja nýtt líf og hún veit að til þess verður hún að hætta alveg að tala við hann. Vinir hennar styðja hana í þessu" sagði heimildamaður blaðsins.