Gylfi: Í takt við það sem ég óttaðist

„Þetta er í takt við það sem ég hafði óttast, en ekki í takt við það sem ég hafði vonast eftir," segir Gylfi Arnbjörnsson, formaður Alþýðusambands Íslands um vaxtaákvörðun Seðlabankans.

Vextir lækkuðu um 2,5% í morgun, í 13%. Gylfi fundaði með seðlabankastjóra og aðstoðarseðlabankastjóra Seðlabanka Íslands í morgun. Gylfi sagði að á þeim fundi hefði komið fram að stýrivextir yrðu lækkaðir verulega á næstu tveimur til fjórum mánuðum. Það væri mikið fagnaðarefni ef það gæti gengið í gegn. Hann segir að ákveðið hafi verið að skipa hátt setta nefnd með fulltrúum Seðlabanka og forsvarsmönnum atvinnulífsins sem muni fara yfir aðstæður í efnahagslífinu fyrir stýrivaxtaákvarðanir í framtíðinni.

„Ég ætla bara að ítreka að það er stefna ASÍ að það sé ekki nema 2 - 4% munur á vöxtum hér og á evrusvæðinu," sagði Gylfi, aðspurður um hverju hann ætti von á við næstu stýrivaxtaákvörðun í júní.