Misheppnuð typpastækkun veldur sjálfsmorði

Yfirvöld í Kambódíu vöruðu í gær þarlenda karlmenn við því að reyna heimatilbúnar aðferðir til typpastækkana. Þetta var gert í kjölfar þess að maður framdi sjálfsmorð í kjölfar misheppnaðrar typpastækkunar.

Maðurinn hafði að sögn stjórnvalda sprautað þykkingarefni fyrir hár í lim sinn, en aukaverkanir þess voru svo sársaukafullar að maðurinn hengdi sig á endanum vegna kvala.

Í auglýsingum fyrir þykkingarefnið var því lofað að það gerði hár þykkara og meira glansandi. Sú varð hinsvegar ekki raunin fyrir lim mannsins, sem varð alþakinn sársaukafullum blöðrum.

Yfirvöld sögðust hafa sagt opinberlega frá þjáningum mannsins til að vara aðra við að reyna svipaðar aðferðir. Þau trúa því að þetta sé ekki einangrað tilvik.