Stjórnvöld geti ekki vikið sér undan ábyrgð

Guðlaugur Þór Þórðarson, þingmaður, segir að stjórnvöld geti ekki vikið sér undan ábyrgð þegar kemur að fjárhagslegri endurskipulagningu skuldsettra fyrirtækja. Á fundi viðskiptanefndar með forsvarsmönnum bankanna í gær kom fram að þeir telji sig vinna að fullu eftir vilja stjórnvalda og þeim skilaboðum sem stjórnvöld hafi gefið bönkunum sem eigendur.

Viðskiptanefnd Alþingis fundaði með forsvarsmönnum bankanna, bankasýslu ríkisins og samtaka fjármálafyrirtækja í gær um verklagsreglur bankanna. Boðað var til fundarins til að ræða skuldameðferð fyrirtækja og aðkomu eigenda að hugsanlegri endurskipulagningu fyrirtækja sinna - en mál Haga og Samskipa hafa verið mikið í umræðunni að undanförnu.

Á fundinum kom skýrt fram að forsvarsmenn bankanna telji sig vinna að fullu eftir vilja stjórnvalda og þeim skilaboðum sem stjórnvöld hafi gefið bönkunum sem eigendur. Skilanefndir Kaupþings og Glitnis stýra nú Arion og Íslandsbanka, en þar á ríkið einnig hlut. Landsbankinn er að mestu í eigu ríkisins.

Guðlaugur Þór Þórðarson, þingmaður, segir að rætt hafi verið sérstaklega um málefni Samskipa og Haga, en eigendur þeirra, núverandi og fyrrverandi, skulda Arion háar fjárhæðir.

Gagnrýnt hefur verið að Ólafur Ólafsson, sem hefur réttarstöðu grunaðs í rannsókn á meintri markaðsmisnotkun hjá Kaupþingi og skuldar Arion banka tugi milljarða í gegnum félög sín hafi fengið að halda Samskipum eftir endurskipulagningu. Guðlaugur Þór segir að stjórnvöld stýri málum. Frá bankahruni hafi bankarnir verið beint og óbeint á forræði stjórnvalda.