Draumur framsóknarmannsins að eignast Land Rover

Björn Ingi Hrafnsson, borgarfulltrúi og formaður borgarráðs, hefur undanfarið sést þeysast um götur borgarinnar á glænýjum Land Rover Discovery jeppa.

Aðspurður segir Björn Ingi það vera draum hvers framsóknarmanns að eignast slíkan bíl enda hafi Land Rover fylgt framsóknarmönnum til sjávar og sveita í áratugi. Björn Ingi, sem ferðast mikið um landið í tengslum við vinnuna, segir bílinn sérstaklega góðan við íslenskar aðstæður. Hann er auk þess mjög ánægður með að hann skuli vera díselknúinn sem gerir hann umhverfisvænni.

Björn Ingi ók áður um á Ford Explorer jeppa en lét draum framsóknarmannsins rætast fyrir nokkrum vikum þegar hann festi kaup á Land Rover jeppanum sem kostar litlar sjö milljónir króna.