Ræðir við öldungadeild Bandaríkjaþings um orkumál

Forseti Íslands kemur í dag á fund fastanefndar Öldungadeildar Bandaríkjaþings til að ræða hvernig nýta megi jarðvarma og miðla reynslu Íslendinga. Ætla má að þetta sé í fyrsta sinn sem íslenskur forseti kemur fyrir þingnefnd í Bandaríkjunum eða annars staðar.

Ólafur Ragnar Grímsson, forseti Íslands, hélt í gær fyrirlestur í boði Harvard-háskóla en þar var að hefjast fyrirlestraröð helguð framtíð orkumála. Um tvö hundruð og fimmtíu manns munu hafa hlýtt á forsetann við það tækifæri. Lagði hann áherslu á nauðsyn víðtækrar samvinnu íslenskra og bandarískra vísindamanna og sérfræðinga sem grundvöll að stórfelldum áföngum í nýtingu jarðvarma.

Jarðvarmi verður svo til umræðu hjá fastanefndar Bandaríkjaþings sem fjallar um orku- og auðlindamál. Þar verður forseti Íslands fyrstur til að svara spurningum nefndarmanna í dag. Á fundinum verður rætt um lagafrumvarp sem miðar að því að hvetja til þess að jarðvarmi verði nýttur enn frekar til okruframleiðslu í Bandaríkjunum. Forsetinn mun miðla af reynslu Íslendinga.

Eftir því sem fréttastofa kemst næst er þetta í fyrsta sinn sem íslenskur forseti ber vitni fyrir þingnefnd - hvort sem er í Bandaríkjunum eða annars staðar.