Forsetinn vill ekki hitta eiginkonu dæmds bankamanns

Viðhorfspistill Tinnu Brynjólfsdóttur á Vísi hefur vakið verulega athygli en þar greinir hún frá því að forseti Íslands, Guðni Th. Jóhannesson hafi neitað að taka á móti henni en hún hefur falast eftir því að fá fund með forsetanum.

Tinna er eiginkona Magnúsar Arnar Arngrímssonar sem hlaut tveggja ára fangelsisdóm í Hæstarétti í hinu svokallaða BK-máli í desember 2015 auk þess sem hann hlaut tveggja ára fangelsisdóm í Aurummálinu í héraðsdómi í nóvember árið 2016.

Tinna óskaði eftir fundi en forsetinn svaraði á þá leið að honum sé ekki heimilt að hlutast til um málefni einstaklinga sem telja á sér brotið í stjórnkerfinu. Hann bendir á að í því ljósi sé ekki skynsamlegt að þau eigi fund.

„Þarna sjáum við úr hverju Guðni er gerður. Hann vill ekki einu sinni vita hvað ég hef að segja!“ skrifar Tinna sem kynnir sig í pistli sínum sem eiginkonu manns sem situr saklaus í fangelsi.

Guðni tók vel í beiðni Dagnýjar Magnúsdóttur á dögunum að hitta sig. Skrifaði Dagný forsetanum bréf og bað hann um að hjálpa sér að láta draum sinn rætast, að taka í hönd forsetans. Guðni svaraði kalli Dagnýjar og hitti hana á skrifstofu sinni.

Tinna deildi fréttinni á Facebook með textanum: „Flottar myndirnar af Guðna og Dagnýju, koma virkilega vel út...

 

Vísir birti jafnframt annan pistil þar sem tekið er í sama streng. Ingibjörg Kristjánsdóttir, eiginkona Ólafs Ólafssonar sem kenndur hefur verið við Samskip, er höfundur. Ólafur hlaut fjögurra ára fangelsisdóm í Hæstarétti í febrúar 2015 fyrir aðild sína að Al Thani-málinu. Hún segir pistil Tinnu athyglisverðan og viðbrögð Guðna séu afleit.

„Ég er agndofa yfir þessu svari. Hann hefur að mér sýnist, lagt sig fram um að opna Bessastaði fyrir sem flestum. Hann hefur meðal annars opnað dyr sínar fyrir flóttamönnum, sem er gott og hann hefur verið iðinn við að tala fyrir málstaði minnihlutahópa. Að sjálfsögðu hafa allir þessir fundir verið í fylgd fjölmiðla og vel kynntir á fésbókarsíðu hans og í fjölmiðlum.“

Ingibjörg bendir á að Guðni fái einkaskilaboð frá „ráðþrota manneskju sem biður hann um fund til þess að ræða háalvarlegt mál sem eru mannréttindabrot framin af íslenska ríkinu á þegnum sínum. Hvað gerir hann?…jú hann einfaldlega hafnar því að hitta hana.“