UEFA, knattspyrnusamband Evrópu, hefur tilkynnt að stefnt sé að því að keppnistímabilinu í vetrardeildum álfunnar verði lokið 30. júní.
Í tilkynningu frá UEFA segir að um þetta hafi náðst víðtæk sátt. Vegna óvissunnar sem útbreiðsla kórónuveirunnar skapar er hins vegar sleginn sá varnagli að markmiðið um 30. júní velti á því að staðan batni og hægt verði að byrja að spila aftur fótbolta áður en langt um líður.
Áður hafði verið tilkynnt að Evrópumóti landsliða, sem hefjast átti í júní, yrði frestað um eitt ár.
UEFA hefur einnig samþykkt að hnika til leikdögum í forkeppnum Meistaradeildar Evrópu og Evrópudeildar í sumar, eins og þurfa þykir dragist tímabilið enn frekar á langinn. Þannig er ljóst að UEFA útilokar ekki að halda tímabilinu áfram fram yfir 30. júní.
Í kvöld áttu lið Manchester City og Real Madrid að mætast, sem og Juventus og Lyon, í 16-liða úrslitum Meistaradeildarinnar. Ákveðið var í síðustu viku að fresta öllum leikjum í keppninni um óákveðinn tíma. Keppni í ensku úrvalsdeildinni hefur verið frestað til 4. apríl hið minnsta, og svipaða sögu er að segja um aðrar knattspyrnudeildir Evrópu.
