Jóhann Berg Guðmundsson gæti snúið aftur á völlinn á sunnudaginn þegar Burnley tekur á móti Sheffield United í ensku úrvalsdeildinni.
Jóhann Berg hefur ekkert spilað með Burnley síðan í 4-2 sigri á Peterborough United í ensku bikarkeppninni 4. janúar síðastliðinn vegna meiðsla. Síðasti leikur íslenska landsliðsmannsins í ensku úrvalsdeildinni var gegn Aston Villa á nýársdag.
Á blaðamannafundi í dag sagði Sean Dyche, knattspyrnustjóri Burnley, að Jóhann Berg gæti tekið þátt í leiknum gegn Sheffield United.
LATEST: Boss Sean Dyche confirms Johann Berg Gudmundsson could be involved against Sheffield United on Sunday. Jay Rodriguez also back training and being assessed but Matt Lowton misses out along with Ashley Barnes and Chris Wood. Robbie Brady a 'maybe' and doubt over Jack Cork.
— Burnley FC (@BurnleyOfficial) July 3, 2020
Þrátt fyrir að fjölmargir leikmenn séu frá vegna meiðsla hjá Burnley hefur liðið unnið síðustu tvo leiki sína og er í 10. sæti ensku úrvalsdeildarinnar.
Jóhann Berg hefur aðeins leikið sjö deildarleiki með Burnley á þessu tímabili. Hann hefur verið hjá félaginu síðan 2016. Jóhann Berg á eitt ár eftir af samningi sínum við Burnley.
