Hafa áhyggjur af notkun gríma sem líkja eftir þjálfun í þunnu lofti

Óskar Ófeigur Jónsson skrifar 26. desember 2025 21:24

Skíðakona með súrefnisgrímu á æfingu með finnska skíðalandsliðinu. Getty/Nils Petter Nilsson

Dauðsfall norsks skíðamanns kallar fram áhyggjur í Noregi af þjálfun með sérstakar súrefnisgrímur sem hefur það markmið að líkja eftir æfingum skíðafólks í mikilli hæð.

Norska afreksíþróttasambandið, Olympiatoppen, talar tímabundið gegn notkun á búnaði fyrir hermda hæðarþjálfun eftir andlát skíðamannsins Siverts Guttorm Bakken.

Þetta kemur fram á vef norska ríkisútvarpsins.

Margar spurningar hafa vaknað

„Margar spurningar hafa vaknað í tengslum við notkun á hæðargrímum og hæðartjöldum meðal íþróttafólks okkar. Það sem við getum sagt er að notkun á slíkum búnaði er ekki hluti af skipulagðri þjálfun á vegum Norska skíðaskotfimleikasambandsins,“ sagði Emilie Nordskar, starfandi framkvæmdastjóri, við NRK.

„Við vitum þó að nokkrir einstakir íþróttamenn hafa útvegað sér slíkan búnað. Öll notkun á honum skal að sjálfsögðu vera í samræmi við leiðbeiningar Olympiatoppen, sem eru einnig þær leiðbeiningar sem Skíðaskotíþróttasambandið fylgir. Notkun á þessari tegund búnaðar er ekki í andstöðu við reglur norskra íþrótta,“ sagði Nordskar.

Þrátt fyrir það greip sambandið strax til aðgerða, sem varúðarráðstöfunar.

Öll notkun skuli hætta tafarlaust

„Það sem við höfum gert er að á aðfangadag sendum við skilaboð til allra okkar íþróttamanna um að öll notkun á hermdri hæð skuli hætta tafarlaust, þar til annað verður tilkynnt,“ sagði Nordskar.

Öðrum spurningum mun Norska skíðaskotíþróttasambandið svara síðar.

Mikilvægast er fjölskyldan og liðsfélagar Siverts

„Aðaláhersla okkar núna er að hlúa að öllum þeim sem þetta snertir, mikilvægast er fjölskyldan og liðsfélagar Siverts. Það verður líka það sem við munum leggja mesta áherslu á á næstunni. Þetta er á allan hátt mjög sorgleg staða sem hefur áhrif á heilt samfélag, alla skíðaskotíþróttafjölskylduna, einnig á alþjóðavettvangi,“ sagði Nordskar.

Hinn 27 ára gamli Norðmaður fannst látinn á hóteli á Ítalíu á Þorláksmessu, þar sem hann dvaldi við æfingar.

Bakken notaði meðal annars svokallaða hæðargrímu, sem dregur úr súrefnismagni til að líkja eftir þjálfun í mikilli hæð.