Lýtalæknar neita enn að afhenda landlækni upplýsingar

Lýtalæknar neita enn að afhenda landlækni upplýsingar um sílíkonaðgerðir á brjóstum. Málið er nú á borði Persónuverndar. Landlæknisembættið ítrekaði í ársbyrjun beiðni sína um gögn frá lýtalæknum og er fresturinn útrunninn.

Félag lýtalækna leitaði til Læknafélags Íslands vegna upplýsingabeiðni landlæknis og funduðu fulltrúar þeirra í gær.

Geir Gunnlaugsson, landlæknir, segir mikilvægt að fá þessar upplýsingar til að embættið geti sinnt eftirlitsskyldu sinni.

„Fulltrúar lýtalækna telja sig bundna ákveðnum trúnaði gagnvart sínum skjólstæðingum sem hafa leitað til þeirra vegna þessara aðgerða og hafa óskað eftir því að óskað verði eftir áliti Persónuverndar vegna afhendingar þessara gagna og málið er í þeim farvegi. núna," segir Geir. Hann segist ekki vita hve langan tíma Persónuvernd hafi til þess að taka ákvörðun í málinu.

Geir segir það skoðun sína að læknar geti ekki neitað að afhenda embættinu upplýsingar af þessu tagi. Hann segir hinsvegar ljóst að það ekki sé samhljómur á meðal landlæknis og lækna í því máli. Læknarnir vilji ganga úr skugga um að ekki sé gengið gegn persónuvernd þeirra einstaklinga sem hafa sótt þjónustu hjá þeim.