Formaður Neytendasamtakanna undrast mikinn verðmun á umfelgun

Dekk ökutækja koma óvenju illa undan snjóléttum vetri hér á suðvesturhorni landsins í ár. Eigandi dekkjaverkstæðis segir líklegt að margir þurfi ný vetrardekk næsta vetur. Allt að sextíu og fimm prósenta verðmunur er á umfelgun á milli dekkjaverkstæða.

Sumardagurinn fyrsti var á fimmtudaginn en þrátt fyrir það þá er veturinn ekki alveg búinn að sleppa tökunum. Það er hins vegar sá tíma að eigendur ökutækja þurfa að fara að huga að umfelgun. 15. apríl síðastliðinn áttu nagladekkin að vera farin undan en lögreglan er enn þá ekki farin að sekta. Hún metur aðstæður hverju sinni. Á dögunum var Félag íslenskra bifreiðaeigenda með könnun þar sem kom fram að sextíu og fimm prósenta verðmunur á á umfelgun á milli fyrirtækja.

Könnun Félags íslenskra bifreiðaeigenda var gerð 19. apríl síðastliðinn en hringt var á milli dekkjaverkstæða á höfuðborgarsvæðinu og á landsbyggðinni.

Spurt var um listaverð og eingöngu miðað við umfelgun á álfelgum þar sem gert er ráð fyrir því að álfeglur séu undir 2/3 hluta fólksbíla hér á landi.

Spurt var: Hvað kostar umfelgun og jafnvægisstilling á fjórum 16 tommu álfelgum?

65% prósenta munur er á hæsta og lægsta verði. Ódýrust reyndist umfelgun hjá Dekkjahúsinu í Kópavogi þar sem kostnaðurinn var 5.990.- krónur. Samkvæmt könnuninni var dýrast að fara á dekkjaverkstæði N1, en þar var kostnaðurinn 9.493.- krónur.

Formaður Neytendasamtakanna undrast þessi mikli verðmunur.

„Manni dettur í hug að neytendur séu kannski ekki í nægjanlegu mæli að gera verðsamanburð þegar þeir ákveða hvar þeir ætla að umfelga. Séu kannski vanafastir. Ég hef á tilfinningunni að það sé að breytast. Neytendur eru að vakna og ég held að menn komist ekki upp með svona eins og áður,“ segir Ólafur Arnarson, formaður Neytendasamtakanna.

Hvernig fer vertíðin af stað?

„Hún fer mjög vel af stað, þó seint sé. Það eru búin að vera veðraskipti undanfarna daga en þetta byrjar mjög vel hjá okkur núna,“ segir Eiður Ármannsson, framkvæmdastjóri Dekkjahússins.

Þetta er búinn að vera óvenju sjónléttur vetur hér á höfuðborgarsvæðinu hvernig koma dekkin undan?

„Mjög illa. Það má segja eins og er þau koma mjög illa undan. Slæmir vegir líka. Það hefur sínar afleiðingar,“ segir Eiður.

Er það ávísun á það að næsti vetur verður dýr fyrir eigendur ökutækja?

„Já. Ég held að það sé meiri hugsun hjá fólki í dag að hafa góð dekk undir bílnum yfir veturinn vegna þess að það er farið að reyna mikið meira á þetta en eins og þetta hefur verið í vetur að þá hafa dekk slitnað óvenju illa og það verður ávísun á að fólk keyri dekkin út í sumar og kaupi ný næsta vetur líka,“ segir Eiður.