Dýrahræ geymd í tunnu við lögreglustöð

Hræ dýra sem finnast í Reykjavík eru geymd í tunnu fyrir utan lögreglustöðina við Hverfisgötu þar til meindýraeyðir sækir þau og fer með þau á Dýraspítalann í Víðidal. Dýraverndarsamband Íslands furðar sig á verklagi lögreglunnar þegar dýr eru annars vegar.

„Það var gámur á dýraspítalanum en tunnan er núna hjá okkur og hefur verið í svolítinn tíma. Ef dýrið er sannanlega dautt þá fer það í tunnuna og meindýraeyðir Reykjavíkurborgar kemur og tæmir tunnuna,“ segir Jóhann Karl Þórisson aðstoðaryfirlögregluþjónn og bætir við að meindýraeyðirinn eigi að koma einu sinni í viku.

Sigrún Pétursdóttir týndi kettinum sínum í sumar og fékk þær upplýsingar frá vitni að keyrt hefði verið á hann, og að lögreglan hefði sótt hræið stuttu síðar. Sigrún hringdi í lögregluna og á Dýraspítalann en ekkert bólaði á kettinum.

„Við hringdum oft á báða staði en enginn kannaðist við að hafa sótt hann. Lögreglan sagði að engin skýrsla væri til um málið en sagði útilokað að kötturinn væri hjá þeim,“ segir Sigrún.

Um hálfum mánuði seinna fékk hún símtal frá Dýraspítalanum í Víðidal en þá var hræ kattarins komið í þeirra hendur. Hún fékk þær upplýsingar að lögreglan hefði skilað kettinum á spítalann.

Jóhann Karl segist ekki kannast við þetta tiltekna mál, enda engin skýrsla til um málið.

„Ef meindýraeyðirinn hefur ekki komið í tvær vikur, þá veit ég ekki hvort það hafi verið sumarleyfi hjá honum.“

Sigrún var reið yfir því að finna ekki köttinn sinn, enda var hún ekki viss hvort keyrt hefði verið á hann eða annan kött.

„Ég hélt upphaflega að mistökin lægju hjá dýraspítalanum. Mér datt ekki í hug að hann væri bara í einhverri tunnu á lögreglustöðinni.“

Hallgerður Hauksdóttir, formaður Dýraverndarsambands Íslands, segir alvarlega brotalöm vera á því hvernig lögreglan nálgist mál sem koma upp gagnvart dýrum.

„Varðandi þessa geymsluaðferð þá finnst mér að lögreglunni beri að vera með reglur sem leiða til þess að eigandi dýrsins finnist. Lögreglan á að leggja það á sig að vera með örmerkjalesara og fara í gagnagrunninn og fletta upp eigandanum. Einnig að geymsla á dýrum sé þannig að hræið varðveitist.“

„Ef það á að varðveita hræ, þá á að geyma þau í kæli,“ segir Hallgerður og bætir við að Dýraverndarsambandi Íslands telji þetta verkferli ekki forsvaranlegt gagnvart gæludýraeigendum sem eru um 40 prósent íslenskra heimila.

Að sögn Hallgerðar var það á dagskrá Dýraverndarsambandsins að óska eftir fundi með lögreglunni í vetur til að ræða verklagsreglur lögreglunnar vegna mála líkum þessum.