Hitabylgja í spánni fyrir hvítasunnuna

„Þetta lítur mjög vel út hvað varðar hita á norðan- og austanverðu landinu," segir Einar Magnús Einarsson, veðurfræðingur á Veðurstofu Íslands.

Samkvæmt veðurspám mun verulega fara að hlýna á Norðausturlandi á miðvikudag og fram á Hvítasunnuhelgina sem er fyrsta stóra ferðahelgi ársins. Spáin í gærkvöldi sýndi að í hádeginu á laugardag verði hitinn 23 stig á Egilsstöðum. Ekki spillir fyrir að heiðskírt verður og hægur vindur.

Einar segir ástæðuna fyrir komandi hlýindum vera „bullandi" sunnanátt. „Þá fáum við hlýtt loft yfir landið sem síðan þrýstist niður á norðanverðu landinu," segir hann.

Spáð er að á miðvikudaginn verði orðið hlýtt á Norðurlandi. Til dæmis er spáð nítján stiga hita og léttskýjuðu á Húsavík þann dag. Síðan er útlit fyrir að hitinn verði á bilinu átján til tuttugu stig dagana þar á eftir meira og minna frá Akureyri og austur á Hérað.

„Á miðvikudag má búast við hita að minnsta kosti langleiðina upp í tuttugu gráður á Norðausturlandi. Ég myndi veðja á að hitahámörkin verði í Ásbyrgi og á Vopnafirði. Og síðan á Héraði á laugardag og sunnudag þegar vindurinn er orðinn vestanstæðari," segir Einar.

Að sögn Einars fylgir hlýindunum bjartviðri á Norðurlandi meira og minna frá því um eftirmiðdaginn á miðvikudag fram á laugardag. Sunnanáttin verði ákveðin, á bilinu fimm til þret-tán metrar á sekúndu en jafnvel hægari vindur sums staðar. Spá Veðurstofunnar nær ekki enn yfir alla Hvítasunnuhelgina. „En mér sýnist ekkert vera að breytast í spánni á sunnudaginn. Það eru meiri líkur en minni á að spáin rætist," segir Einar.

Í öðrum landshlutum en á Norðausturlandi verður tiltölulega milt veður en vætusamt frá og með morgundeginum. „Það er rigning víða um land á þriðjudaginn og framan af miðvikudegi en síðan má búast við rigningu eða súld með köflum sunnan- og vestanlands," segir Einar Magnús Einarsson.

gar@frettabladid.is