Rosenborg og Stabæk í viðræðum um kaupverð á Veigari Páli

Norska sjónvarpsstöðin TV 2 greinir frá því að norsku meistararnir í knattspyrnu Rosenborg séu í viðræðum við Stabæk um kaup á Veigari Páli Gunnarssyni.

Veigar Páll hefur farið á kostum í norsku deildinni í ár og skorað sjö mörk. Inge André Olsen framkvæmdastjóri Stabæk hefur neitað að tjá sig um málið. Kollegi hans hjá Rosenborg, Erik Hoftun, vill heldur ekkert um málið segja.

Komist félögin að samkomulagi má Veigar Páll spila með Rosenborg 1. ágúst þegar félagaskiptaglugginn opnar á nýjan leik.