George Michael langar í demantahauskúpu

George Michael og kærastinn hans, Kenny Gross eru að spá í að kaupa sex milljarða hauskúpu eftir listamanninn Damien Hirst.

Verkið, sem nefnist ,,For the Love Of God" er afsteypa úr platínu af hauskúpu frá átjándu öld. Upprunarlegar tennur skreyta kúpuna ásamt 8601 demanti sem samtals eru rúmlega ellefu hundruð karöt og metin á rúman einn og hálfan milljarð króna.

Talsmaður parsins sagði að þeir hefðu fengið einkasýningu á verkinu og að þeir hugleiddu nú að bæta því í listaverkasafn sitt sem nú þegar er metið á um hundrað milljónir punda, eða rúma tólf milljarða króna.

Söngvarinn á þegar eitt verk eftir Hirst, ,,Saint Sebastian, Exquisite Pain" en það er kálfsskrokkur í formalíni, bundinn við staur og stunginn með örvum.