Þorum ekki einu sinni sjálf að ferðast

„Við erum búin að sýna skemmtilegt myndband út um allan heim, þar sem allir eru svo glaðir og kátir, en svo þorum við ekki einu sinni sjálf að ferðast," segir Lilja Magnúsdóttir, rekstraraðili tjaldstæðis á Kirkjubæjarklaustri.

Hún hefur fengið mikið af fyrirspurnum frá „venjulegum" Íslendingum síðustu daga og vikur sem spyrja hvort það sé óhætt að tjalda á Kirkjubæjarklaustri vegna öskunnar úr Eyjafjallajökli.

Mikil rigning hefur verið á Kirkjubæjarklaustri síðustu daga og segir Lilja að vegna þess sé askan lítið sjáanleg. „Íslendingar hafa lítið látið sjá sig og ég fæ mikið af fyrirspurnum hvort að það sé í lagi að koma með húsbíla, úr því að ekki sé hægt að tjalda. Staðreyndin er hins vegar sú að hér lítur allt svo vel út, gróðurinn er ótrúlega flottur og það er gaman að keyra um Suðurlandið þessa dagana. Það er ótrúlegt hvað allt hefur náð að jafna sig fljótt," segir Lilja.