Eldur í hesthúsi í Skagafirði

Slökkvilið Skagafjarðar var kallað að hesthúsi á Nöfunum um tólf leytið í dag. Kviknað hafði í hesthúsi en þegar slökkvilið kom á staðinn logaði tölverður eldur í húsinu. Húsið hafði á árum áður verið notað sem fjárhús en síðustu ár hefur það gengt hlutverki hesthús og eða tryppiskýlis. Eigendur hússins höfðu verið þarna fyrr í morgun en ekki orðið varir við neitt. Þetta kemur fram á fréttavefnum Feykir.is.

Slökkviliðið hafði náð tökum á aðstæðum rúmlega hálf eitt en sex slökkviliðsmenn voru kallaðir út. Að sögn aðstoðar slökkviliðsstjóra gekk greiðlega að slökkva eldinn en erfitt sé að gera sér grein fyrir ástæðum eldsins sem geti verið margar. Ekki var rafmagn í húsinu en timbrið gamalt og þurrt auk þess sem gamalt hey var í húsinu. Nú klukkan eitt var enn tölverður hiti í rústunum og mun slökkviliðið vakta ástandið eitthvað fram eftir degi.