Allt bendir til þess að tími Mariano Rajoys á stóli forsætisráðherra Spánar sé liðinn. Þingið ræðir nú vantrauststillögu stjórnarandstöðunnar og síðdegis varð ljóst að meirihlutinn styður hann ekki lengur. Greiða á atkvæði um tillöguna á morgun.
Það var flokkur þjóðernissinnaðra Baska, PNV, sem sneri baki við Rajoy á ögurstundu síðdegis í dag. Flokkurinn hefur fimm sæti á spænska þinginu og án atkvæðis þeirra er stjórnin fallin.
Rajoy var ekki sjálfur í þingsalnum þegar Baskarnir tilkynntu afstöðu sína.
Pedro Sánchez, leiðtogi Sósíalista, verður nær örugglega næsti forsætisráðherra án þess að kjósa þurfi á ný. Rajoy hefur sakað hann um ólýðræðisleg vinnubrögð vegna vantraustsins. Hann segir Sánchez hafa lagt tillöguna fram vegna ótta við kjósendur, hann vilji ná völdum án þess að þurfa að ganga til kosninga.
Spænska ríkisstjórnin fallin
Tengdar fréttir
Spænska þingið ræðir vantraust á forsætisráðherra vegna spillingarmála
Framtíð spænska forsætisráðherrans, Mariano Rajoy, mun ráðast á morgun þegar þingið greiðir atkvæði um vantrauststillögu stjórnarandstöðunnar. Vantraustið var rætt á þinginu í dag og var mörgum heitt í hamsi.
