María Birta og Gillz í djarfri kynlífssenu

„Við erum ekki alveg búnir að negla hvernig við ætlum að gera atriðið, en þetta er kynlífsatriði sem gerist í partíi með mörgum þátttakendum," segir Óskar Þór Axelsson, leikstjóri kvikmyndarinnar Svartur á leik. Tökur á myndinni hefjast í lok þessa mánaðar og eru þeir Jóhannes Haukur Jóhannesson og Þorvaldur Davíð Kristjánsson í aðalhlutverkum ásamt Maríu Birtu Bjarnadóttur og Agli Einarssyni, betur þekktum sem Gillz.

María Birta hefur lýst því yfir í fjölmiðlum að í kvikmyndinni verði djörf kynlífssena og nú er komið í ljós að það er Egill Einarsson, sjálfur Gillz, sem mun leika á móti henni í senunni. Óskar Axel vildi ekki gefa upp nein smáatriði í sambandi við það, sagði það þó eiga sér stað í kringum einn af hápunktum kvikmyndarinnar. „Þetta er ekkert „full monty"-atriði en það er svolítið djarft og krefjandi fyrir leikarana." Hann upplýsir að Egill hafi komið honum og öðrum sem standa að myndinni á óvart í samlestri og á æfingum. „Hann hefur staðið sig alveg frábærlega, hann er mjög „pró" og það er ekki að sjá að hann sé eitthvað óreyndur."

Ekki náðist í Maríu Birtu í gær en Egill var kokhraustur að vanda þegar Fréttablaðið náði tali af honum. Hann segist ekkert vera óvanur því að skella sér úr að ofan og raunar heldur ekki að leika í ástarsenu. Hann og Auðunn Blöndal voru auðvitað mjög innilegir í stiklukeppni Sveppa og Audda fyrir skemmstu. Spurður hvað kærustunni hans, Gurrý Jónsdóttur, finnist um þetta segir Egill að hún skilji líf leikarans. „Maður er jú bara að leika."- fgg