Fjórtán ár fyrir árás á föður sinn

Þorvarður Davíð Ólafsson hefur verið dæmdur í fjórtán ára fangelsi fyrir tilraun til manndráps. Hann réðst á föður sinn, Ólaf Þórðarson, og veitti honum lífshættulega áverka. Ólafur hlaut alvarlegan heilaskaða og hefur dvalið á Grensásdeild. Ákæruvaldið segist ekki vita til þess að þyngri dómur hafi fallið fyrir tilraun til manndráps. Slíkir dómar hafa verið í kringum fimm ár.

 

Þorvarður játaði sök fyrir dómi. Hann kvaðst hafa verið að drekka og neyta fíkniefna með konu sama dag og atlagan átti sér stað. Konan hefði borið sakir á föður hans, sem hann hefði þá trúað. Eftir þetta hélt Þorvarður á heimili föður síns til að ræða þetta við hann. Hann kvaðst hafa misst stjórn á sér og meðal annars kýlt föður sinn tvisvar af afli í höfuðið með hnúajárni, auk þess að sparka ítrekað í hann. Konan sem bar sakirnar á Ólaf sagði síðar við skýrslutökur að hún hefði aldrei hitt hann né haft nokkur samskipti við hann.

Þorvarður bar fyrir dómi að hann hefði áður ráðist á föður sinn, þá einnig vegna upplýsinga sem hann hefði trúað.

 

Auk fjórtán ára fangelsis var Þorvarður dæmdur bótaskyldur vegna líkamstjóns föður hans.- jss