Ekkert minnst á Icesave í ræðu Sigmundar Davíðs

Sigmundur Davíð Gunnlaugsson formaður Framsóknarflokksins vill að flokkurinn einsetji sér að verða leiðandi stjórnmálaflokkur á Íslandi innan fimm ára, eða áður en aldarafmæli flokksins, gengur í garð. Þetta er á meðal þess sem fram kom í ræður formannsins á flokkþingi framsóknarmanna sem hófst í dag. „Í dag hefjum við vegferð til bjartra tíma. Í dag hefjum við á ný framsókn Íslands," voru lokaorð Sigmundar í annars yfirgripsmikilli ræðu þar sem farið var yfir helstu mál sem á Íslendingum brenna nú um stundir og til framtíðar.

Athygli vekur að orðið Icesave kemur hvergi fyrir í ræðu Sigmundar, en hann hefur verið ötull talsmaður þess að þjóðin hafni Icesave-samningunum sem kosið verður um á morgun.

Hann vitnaði þó til Jóns Sigurðssonar og sjálfstæðisbaráttunnar og minnti á orð hans um að lög skuli standa. „Undir forystu hans losnuðu Íslendingar undan oki erlends kaupmannaveldis og fengu frelsi til að versla við allar þjóðir."

„Þegar rætt var um fjárhagslegan aðskilnað Íslands og Danmerkur lét hann sér ekki nægja að fara fram á að Íslendingar réðu eigin efnahag, hann hélt því fram að Danir skulduðu Íslendingum himinháar upphæðir. Reikningskrafan svo kallaða var ekki samþykkt en hún stappaði stálinu í Íslendinga og styrkti þá í sjálfstæðisbaráttunni," sagði Sigmundur meðal annars og bætti við að Jón hafi aldrei vikið frá grundvallaratriðum þrátt fyrir að hafa ávallt verið tilbúinn til málamiðlana til að ná áföngum á réttri braut.

„Það væri ekki við hæfi að einhver þeirra stjórnmálaflokka sem starfa nú, 200 árum eftir fæðingu Jóns Sigurðssonar, reyndi að gera tilkall til Jóns eða stjórnmálastefnu hans. Innra með mér þykist ég hins vegar vita hvar í flokki hann ætti heima," sagði Sigmundur, en ræðu hans í heild sinni má lesa hér að neðan.